Ռուսական Независимая газета-ն անդրադարձել է ղարաբաղյան հակամարտությանը, որը ներկայացնում ենք Ձեր ուշադրությանը:
Վաղը Երևան է ժամանելու ԱՄՆ պետքարտուղարի տեղակալ Ջեյմս Սթեյնբերգը: Նա երկու օր կմնա Երևանում, ապա կմեկնի Թբիլիսի և Բաքու: Այցելության նպատակն է ծանոթանալ իրավիճակին տարածաշրջանում, որտեղ մեծ է հակամարտությունների վերսկսման հնարավորությունը: Օրինակ` երկուշաբթի օրվա ընթացքում Ադրբեջանից հակասական տեղեկություններ էին ստացվում բախումների վերաբերյալ Լեռնային Ղարաբաղի հետ շփման գոտում: Որոշ տեղեկություններով, սպանվել է 7 ադրբեջանցի զինվոր, մեկ այլ տեղեկությամբ` 1:
Ջեյմս Սթեյնբերգը հանդիպելու է երեք հանրապետությունների ղեկավարների հետ: Նրան տարածաշրջանային այցելության ժամանակ ուղեկցում է ԱՄՆ պետքարտուղարի մյուս տեղակալ Ֆիլիպ Գորդոնը, որը պատասխանատու է եվրասիական տարածաշրջանի համար: Պետքարտուղարի հանդիպումը Իլհամ Ալիևի և Սերժ Սարգսյանի հետ առավել հետաքրքական է, քանի որ հակամարտող պետությունների ղեկավարները մարտի 5-ին հանդիպելու են Սոչիում:
Սակայն հույսը քիչ է, որ ճակատագրական որոշումներ կարող են ընդունվել: Այդուհանդերձ, հենց միայն հանդիպումը Սոչիում մեծ հաջողություն է` հաշվի առնելով շփման գոտում լարվածության մեծացման փաստը: Այդ լարվածությունը հասել է այն աստիճանի, որ փորձագետների մի մասը այս հակամարտությունը սկսել են անվանել ոչ թե սառեցված, այլ դանդաղ եռացող:
Մասնավորապես, վերջերս ԱՄՆ ռազմավարական և միջազգային հետազոտությունների կենտրոնում տեղի ունեցած քննարկման ժամանակ Ատլանտյան խորհրդի խորհրդական Յան Բժեզինսկին հայտարարել է, որ Լեռնային Ղարաբաղում իրավիճակը վերջին տարիներին նկատելիորեն փոխվել է, իսկ ռազմական բախումները դարձել են սովորական երևույթ:
«Ադրբեջանի կողմից ռազմական բյուջեի մեծացումը հղի է անկայունությամբ: Բաքվի սպառնալիքները, որ Ադրբեջանի ռազմական բյուջեն շուտով կհավասարվի Հայաստանի բյուջեին, վկայում են, որ այդ երկիրն այլևս չի տեսնում ղարաբաղյան հակամարտության կարգավորման հնարավորությունը ոչ ռազմական ճանապարհով: Բաքվի այսօրինակ քաղաքականությունը ստիպում է Երևանին մտածել կարճաժամկետ կտրվածքով կանխարգելիչ գործողություններ իրականացնելու վերաբերյալ»,- կարծում է Բժեզինսկին:
Ատլանտյան խորհրդին Եվրասիական կից կենտրոնի տնօրեն, Թուրքիայում ԱՄՆ նախկին դեսպան Ռոս Ուիլսոնը կարծիք է հայտնել, որ «անհրաժեշտություն կա ավելացնելու ջանքերը միջազգային մոնիտորինգի ուղղությամբ Լեռնային Ղարաբաղում, որը հիմա զգալի նվազել է, այլ կերպ մեծանում է հայ-ադրբեջանական հակամարտության վերսկսման հնարավորությունը»:
НГ-ի լրագրողին հաստատել են շփման գծում իրավիճակի լարված լինելու փաստը, սակայն իրավիճակը բուն Լեռնային Ղարաբաղում հանգիստ է: Թերթը նշում է, որ փետրվարին այս երկրում նշվում է ղարաբաղյան շարժման 23-ամյակը` հիշեցնելով հակամարտության սկսման նախապատմությունը:
Հիմա տարածաշրջանում այլ խնդիրներ են դրված` ամեն կերպ խուսափել պատերազմից, աստիճանաբար, քայլ առ քայլ ստեղծել երկու ժողովուրդների միջև վստահության մթնոլորտ, որոնք դատապարտված են ապրելու կողք կողքի` առանց ավտոմատի նշանակետի անցքից մեկը մյուսին նայելու:
