Փետրվարի 16-18-ը տեղի ունեցավ Հունաստանում Հայաստանի դեսպան Գագիկ Ղալաչյանի այցը Սերբիայի Հանրապետություն:
Փետրվարի 17-ին դեսպան Ղալաչյանը Բելգրադի կառավարական պալատում իր հավատարմագրերը հանձնեց Սերբիայի Հանրապետության նախագահ Բորիս Տադիչին: Հավատարմագրերի հանձնումից հետո տեղի ունեցած առանձնազրույցի ընթացքում տեսակետներ փոխանակվեցին քաղաքական երկխոսության խորացման, բոլոր ոլորտներում երկկողմ հարաբերությունների աշխուժացման ուղիների վերաբերյալ: Զրույցն անցավ բարեկամական, երկկողմ հարաբերություններին առնչվող հարցերի գործնական քննարկման մթնոլորտում:
Դեսպան Ղալաչյանը Սերբիայի նախագահին փոխանցեց նախագահ Սարգսյանի ջերմ ողջույնները, ինչին ի պատասխան նախագահ Տադիչը խնդրեց իր բարեմաղթանքները հաղորդել Հայաստանի իր գործընկերոջը` նշելով, որ ջերմությամբ է հիշում 2009-ին Հայաստան կատարած իր այցը և սպասում է նախագահ Սարգսյանի պատասխան այցին:
Այցի շրջանակներում դեսպանը հանդիպումներ ունեցավ Սերբիայի Ազգային Ժողովի նախագահ դր. Սլավիցա Ջուկիչ-Դեյանովիչի, իսկ Սերբիայի ԱԳՆ-ում` պետական քարտուղար, դեսպան Միրկո Ստեֆանովիչի, Ռուսաստանի և Եվրասիայի վարչության տնօրեն, դեսպան Գորան Ալեքսիչի, դիվանագիտական արարողակարգի ծառայության ղեկավարի հետ:
Գործնական և կառուցողական հունով ընթացած այս հանդիպումների ժամանակ կողմերը կարևորեցին երկու բարեկամ երկրների միջև համագործակցության հետագա ծավալումը, միջխորհրդարանական կապերի զարգացումը, իրավապայմանագրային դաշտի կայացումը, առևտրատնտեսական, մշակութային, գիտակրթական, բարձր տեխնոլոգիաների և այլ ոլորտներում հարաբերությունների աշխուժացումը: