Սիրիայի նախագահ Բաշար Ալ-Ասադը հուլիսի 22-ից հետո առաջին անգամ երևացել է պետական հեռուստաալիքի եթերում՝ Դամասկոս ժամանած Իրանի Ազգային անվտանգության բարձրագույն խորհրդի քարտուղար Սաիդ Ջալիլիին ողջունելիս:
Հիշեցնենք, հուլիսի 22-ին երկրի պետական հռուստաալիքի եթերում Ասադը երևացել էր պաշտպանության նորանշանակ նախարարի երդումն ընդունելիս:
Ինչպես հաղորդում է ITAR-TASS-ը, Դամասկոսում տեղի ունեցած բանակցությունների ընթացքում Ասադը հայտարարել է, որ Սիրիայի կառավարությունն «ընդառաջ կգնա ժողովրդական ձգտումներին և պատրաստ է ճգնաժամը լուծել ժողովրդավարության շրջանակներում»:
Բացի այդ՝ Սիրիայի նախագահը բարձր է գնահատել Թեհրանի դիրքորոշումը Սիրիայում տեղի ունեցող իրադարձությունների և նրա դիվանագիտական նախաձեռնությունների հարցում:
Իրանական Al-Alam հեռուստաալիքը հաղորդել է, որ Իսլամական հանրապետության կառավարությունը «Քոֆի Անանի՝ Սիրիայի կարգավորման ծրագրով շահագրգռված» 12 երկրների արտգործնախարարների հրավիրել է օգոստոսի 9-ին խորհրդակցական հանդիպում անցկացնել Թեհրանում: Դրա նպատակն է քննարկել Սիրիայում հակամարտության դադարեցման ուղիները:
Ջալիլին՝ որպես Իրանի հգևոր առաջնորդ այաթոլլա Խամենեիի ներկայացուցիչը երեկ այցելել է Բեյրութ, որտեղ հանդիպել է Լիբանանի նախագահ Միշել Սուլեյմանի և արտգործնախարար Ադնան Մանսուրի հետ:
«Անհրաժեշտ է սիրիացի ժողովրդին հնարավորություն տալ ընտրություն կատարել իրենց կամքին համապատասխան, և ոչ թե դրսից որոշում փաթաթել նրանց վզին»,- ընդգծել է Ջալիլին մամուլի ասուլիսում:
Նրա կարծիքով՝ Սիրիայի հետագա ճակատագիրը կարող է որոշվել միայն ժողովրդավարական ճանապարհով՝ «կառուցողական ազգային երկխոսություն և ընտրություններ կազմակերպելու միջոցով»:
Ջալիլիի այցը Դամասկոս տեղի է ունեցել Սիրիայի մայրաքաղաքի մերձակայքում իրանցի 48 ուխտավորների առևանգումից հետո:
