ԼՂՀ նախագահ Բակո Սահակյանը այսօր ընդունել է Ղարաբաղ ժամանած Եվրոպական խորհրդարանի մի խումբ պատգամավորների՝ Դանիեն Աբադին (Եվրոպական ժողովրդական կուսակցություն), Միշել Ռեւազին (Եվրոպական կանաչների միություն)` Եվրոպական ժողովրդական կուսակցության փորձագետ Նիկոլաս Զիլբերգլայդի եւ Եվրոպայի Հայ դատի հանձնախմբի պատասխանատու Հիլդա Չոբոյանի ուղեկցությամբ:
Ինչպես հաղորդում են ԼՂՀ նախագահի մամլո գրասենյակից, «հանդիպմանը քննարկվել են Ղարաբաղի եւ եվրոպական հանրության միջեւ կապերի ընդլայնման, ադրբեջանա-ղարաբաղյան հակամարտության կարգավորման, ինչպես նաեւ տարածաշրջանային գործընթացներին վերաբերող հարցեր»: Բակո Սահակյանը ընդգծել է, որ ԼՂՀ արտաքին քաղաքականությունը հիմնված է հավասարակշռության եւ բազմաուղղվածության սկզբունքների վրա, եւ այս համատեքստում մեր հանրապետությունը շահագրգռված է ըստ ամենայնի խորացնել հարաբերությունները Եվրոպայի եւ այն ներկայացնող տարբեր կառույցների հետ:
«Երկուստեք նշվել է Մինսկի խմբի շրջանակներում ադրբեջանա-ղարաբաղյան հակամարտության խաղաղ կարգավորման անհրաժեշտության մասին: Հյուրերը բարձր են գնահատել ԼՂՀ հաջողությունները ժողովրդավարական պետություն կառուցելու ուղղությամբ՝ այն համարելով կարեւոր ողջ տարածաշրջանի համար»,- գրված է ԼՂՀ նախագահականից տարածված հաղորդագրության մեջ: Բակո Սահակյանի հետ եվրոպացի պատգամավորների հանդիպմանը մասնակցում էին նաեւ ՀՀ ԱԺ դաշնակցական պատգամավոր Վահան Հովհաննիսյանն ու Հանրապետական Արա Բաբլոյանը:
