Լոնդոնում օլիմպիական հուշանվերներ արտադրողները սպառողական շղթայում ներառել են նաև նորածիններին: Հանգստյան օրերին օլիմպիական Լոնդոնը արտասովոր մարդաշատ է դարձել: Մեծ հաջողությամբ վաճառվում են էմբլեմները, որը կազմված են երկու՝ մեկաչքանի թալիսմաններից՝ հեծանվային սաղավարտներով Վենլոկից ու Մանդեվիլից: Նշենք, որ էմբլեմների մշակումն ու պատրաստումը տևել է շուրջ մեկ տարի և արժեցել 400 հազար ֆունտ: Այս մասին հաղորդում է ITAR-TASS-ը:
Հուշանվերների խանութները բաց են ոչ միայն Լոնդոնի արևելքում տեղակայված օլիմպիական պարկում, այլ նույնիսկ Բուքինգհեմյան պալատի «պատերի տակ»: Հուշանվերների հավաքածուում կարելի է գտնել հայտնի մարզիկների ինքնագրերով լուսանկարներ, անձրևանոցներ , դրամապանակներ, ակնոցներ, բարձեր, սրբիչներ, վերնաշապիկներ, կրիչներ և նոութբուքերի պատյաններ:
Հուշանվեր արտադրողները աչքաթող չեն արել նույնիսկ փոքրիկներին: Նրանց համար հնարավոր է ձեռք բերել օլիմպիական բոդի, գլխարկներ, շապիկներ և ձեռնոցներ:
Նշենք, որ այս տարի առաջին անգամ լոնդոնյան Օլիմպիադայում բացվել է Ընտանեկան տունը: Նախագիծն իրականացրել է Procter & Gamble ընկերությունը՝ Միջազգային օլիմպիական կոմիտեի հետ համագործակցությամբ: Նախագծի շրջանակում աշխարհի տարբեր երկրների օլիմպիական մարզիկների մայրիկները հրավիրվել են Լոնդոն՝ քաջալերելու իրենց երեխաներին:
