ԵվրԱզԷս-ը կարող է իր կենսունակությունն ապացուցել: «Առաջին լրատվական»-ի հետ զրույցում այս մասին ասաց Հայաստանի քաղաքագետների միության ղեկավար Հմայակ Հովհաննիսյանն` անդրադառնալով օգոստոսի 8-ին ՀՀ նախագահ Սերժ Սարգսյանի այցին Մոսկվա, որտեղ, ըստ ամենայնի, պետք է հստակեցվի Հայաստանի ԵվրԱզԷս-ին անդամակցության հարցը:
Ըստ քաղաքագետի` դաշինքային մտածելակերպից պետք է հրաժարվել այն առումով, որ համագործակցությունը չի կարելի հակադրել մեկ այլ վեկտորով:
«Գլոբալիստական մտածելակերպից նույնպես պետք է հրաժարվել, որովհետև այն հնամաշ մոտեցում է, որը հատուկ է 20-րդ դարին: 21-րդ դարում գլոբալիստական մտածելակերպին պետք է փոխարինի քաղաքակրթությունների երկխոսության մտածելակերպը: Մենք ասիական ժողովուրդ չենք, մենք եվրասիական ժողովուրդ ենք և մենք` հայերս, արևելյան քրիստոնեության ավանդական արժեքային համակարգի կրողներն ենք, պատկանում ենք ինչպես Եվրոպային, այնպես էլ Ասիային, տարիների ընթացքում կամուրջ ենք հանդիսանում և մեր այդ դերակատությունը կարող ենք ստանձնելʽ որպես միջնորդ ասիական ժողովուրդների և եվրոպական ժողովուրդների միջև»,- նշեց Հմայակ Հովհաննիսյանը` կարծելով, որ Հայաստանը կարող է համագործակցություն իրականացնել երկու վեկտորով` ԵվրԱզԷս և ԵՄ:
Նրա խոսքով` պետք չէ դիվայնացնել եվրասիական միության նախագիծը: Դա նախագիծ է, որը կարող է իր կոենսունակությունն ապացուցել, եթե գերիշխի այն մոտեցումը, որ չի կարելի հակադրել երկու ուղղությամբ համագործակցությունը:
