Սեպտեմբերի 9-ին կայանալիք Գյումրու քաղաքապետի ընտրություններում սեփական թեկնածուով հանդես կգա նաև «Ժառանգություն» կուսակցությունը:
Կուսակցության Շիրակի մարզային կառույցի պատասխանատու Վահագն Հովհաննիսյանը «Առաջին լրատվական»-ի հետ զրույցում նշեց, որ կուսակցությունը Գյումրիում ոչ միայն քաղաքապետի, այլ նաև ավագանու անդամության թեկնածուներ է առաջադրելու: «Այս պահին մեր մոտ վերլուծությունների և քննարկումների փուլ է, մոտ մի շաբաթվա ընթացքում մենք վերջնական որոշում կկայացնենք և դրա մասին կհայտարարենք: Մենք գտնում ենք, որ միայն օրենսդիր գործունեությամբ զբաղվելը քիչ է, և մենք պետք է աստիճանաբար տեղափոխվենք գործադիր իշխանության ոլորտ»,- ասաց Վահագն Հովհաննիսյանը:
«ժառանգությունն» ու «Ազատ դեմոկրատները» միասնական թեկնածուով չեն մասնակցի քաղաքապետի ընտրություններին, կուսակցության վարչությունը որոշել է Վահագն Հովհաննիսյանի թեկնածությունն առաջադրել Գյումրու քաղաքապետի ընտրություններին, առաջիկայում նա հայտարարությամբ հանդես կգա: «Մենք առաքելություն ունենքʽ պատասխան տալ մեր ընտրողների առաջ, և պետք է ասեմ, որ դա լուրջ ընտրազանգված է, դա մարդիկ են, որոնք հենց այնպես չեն ընտրել մեզ»,- «Առաջին լրատվական»-ի թղթակցի հետ զրույցում նշեց Վահագն Հովհաննիսյանը:
Ի տարբերություն «Ժառանգություն» կուսակցությանʽ ՀԱԿ-ը Գյումրիում քաղաքապետի սեփական թեկնածուն չի ունենա, փոխարենը կոնգրեսականները ակտիվ մասնակցություն են ունենալու Գյումրու ավագանու ընտրություններում և առաջադրելու են մի քանի թեկնածուներ: Հիշեցնենք, որ ավելի վաղ Գյումրու քաղաքապետի պաշտոնում առաջադրվելու մասին հայտարարել էին ԲՀԿ-ական Սամվել Բալասանյանն ու ՀՅԴ անդամ Հովսեփ Սիմոնյանը: Գյումրու գործող քաղաքապետ Վարդան Ղուկասյանը շարունակում է լռել:
Փայլակ Ֆահրադյան, Շիրակի մարզային թղթակից
