Bravo.am-ի փոխանցմամբ` Քրիստինե Պեպելյանն ու Արման Հովհաննիսյանը զուգերգ են ձայնագրել, որն էլ կներկայացնեն օրերս նկարահանված տեսահոլովակով:
Երգիչները համագործակցության փորձ արել են նաև տարիներ առաջ, բայց որոշ պատճառներով այն ընթացք չի ունեցել:
«Երբ ինձ հետ ես» երգի հեղինակը Սերգեյ Կարինյանն է, գործիքավորել է Արմեն Սարգսյանը`Բրդեն: «Հեղինակին ուղղակի ասել ենք՝ մեզ դուետ է պետք, նույնիսկ երգի ռիթմի ու ոճի մասին ոչինչ չենք ասել, նա էլ մեղեդային այս երգն առաջարկեց ու չսխալվեց, որովհետև երկուսս էլ հավանել ենք»,-BRAVO.am-ին ասել է Քրիստինե Պեպելյանը:
Տեսահոլովակի ռեժիսորը Հրանտ Երիցկինյանն է, օպերատորը` Արտյոմ Աբովյանը: Երգչուհու զգեստների և կերպարների հեղինակը դիզայներ Արամ Նիկոլյանն է: Նկարահանումները կատարվել են Սևանում և Մարզահամերգային համալիրում: «Նավի վրա արված կադրեր կան: Գեղեցիկ պատկերներ ստանալու համար պարտադիր չէ գնալ ծովափնյա երկիր կամ գեղատեսիլ վայրեր փնտրել այլ երկրում, որովհետև մենք ունենք շատ գեղեցիկ բնություն, կարող ենք անգամ ուրիշներին հրավիրել մեր երկրում տեսահոլովակ նկարահանելու:)»,-նշել է երգչուհին:
Տեսահոլովակում որպես հերոսներ ներկայանալու են հենց Քրիստինեն ու Արմանը:
Քրիստինե Պեպելյանի խոսքերով` զուգերգի նպատակը դրա՝ հանդիսատեսի կողմից սիրվելն է. «Երգել ենք մեր սրտի ցանկությամբ ու մեր երկրպագուների համար, այլ ոչ թե հատուկ մրցանակ ստանալու համար»:
Արման Հովհաննիսյանն օրեր առաջ է վերադարձել Միացյալ Նահանգներից, համերգով է հանդես եկել Բոստոնում. սեպտեմբերի սկզբին էլ մեկնելու է Ավստրալիա` կրկին համերգների:
Իսկ Քրիստինե Պեպելյանը պատրաստվում է իր նոր մենահամերգին, որը կայանալու է սեպտեմբերի 28-ին Կարեն Դեմիրճյանի անվան մարզահամերգային համալիր համերգային դահլիճում: Մինչ այդ`օգոստոսի վերջին նախատեսված է այս տեսահոլովակի պրեմիերան: «Երբ ինձ հետ ես»-ը կկատարվի նաև երգչուհու մենահամերգի ժամանակ:
