Պաշտպանության նախարարության դիրքորոշումն անանուն նամակների վերաբերյալ հետևյալն է, որ դրանք այնքան էլ լուրջ չեն: «Առաջին լրատվական»-ի հետ զրույցում այս մասին ասաց ՊՆ մամլո խոսնակ Արծրուն Հովհաննիսյանը` անդրադառնալով Վանաձորի Հելսինկյան ասոցիացիային ուղղված երկրորդ անանուն նամակին:
Նա նշեց, որ իր ոչ պաշտոնական տեսակետն այն է, որ առաջին և վերջին նամակների մեջ կա լուրջ հակասություն, այդ երկու նամակների մեջ կա իրար հերքող, առաջին հայացքից աննշան թվացող, բայց շատ խորքային հակասություն:
«Առաջին նամակը Գրիշա Խաչատուրովի դեմ էր, իսկ երկրորդ նամակում նա ներկայացվում է, որպես լավ հրամանատար: Ես դետալների մեջ խորանալ չեմ ցանկանում, որովհետև, էլի եմ ասում, իմ վերաբերմունքը նման կարգի մոտեցմանն այնքան էլ լուրջ չէ: Այդ հակասությունը տարբեր եզրակացությունների տեղիք է տալիս: Սա ես պաշտոնապես չեմ ասում»,- մեկնաբանեց Արծրուն Հովհաննիսյանը:
Նա նաև նշեց, որ Պաշտպանության նախարարությունը շատ բաներ է անում, շատ բաներ է ուսումնասիրում, շատ բաներ է հաշվի առնում, բայց պարտավոր չէ դրանց բոլորի մասին հստակ տեղեկատվություն տրամադրել կամ ասել, որ այսպիսի բան է արել, ու դրանով իսկ իրեն PR անի:
Հիշեցնենք, որ Հելսինկյան քաղաքացիական ասամբլեայի Վանաձորի գրասենյակի էլեկտրոնային փոստի հասցեով երեկ ստացվել էր անանուն նամակ զինծառայող Թաթուլ Գրիգորյանի պահվածքի վերաբերյալ: « Շատ վատ ա էտ վաշտում վիճակը և ոչ ոք ոչինչ չի կորող անել, էտ զինվորը համարյա ամեն օր հարբում ա, գիշերվա ժամը 4-ին մտնում ա զորանոց, գոռում ա, մյուս զինվորներին քնից հանում ա, ջարդում-փշրում ա, սաղ վախի մեջ են քնում, որ ինքը խմած ա լինում, ինչ կուզի կանի, ինքը ՀՀԿ-ական ազգային ժողովի պատգամավորի տղա ա, ամեն ամսվա վերջ զինվորներից հավաքում ա իրանց հասանելիք 3400 դրամը, հոգեպես ճնշում ա, ինքը ամենակարողն ա»,- նշել էր նամակի հեղինակը:
