Հանգստի մեկնելուց առաջ պետք է ունենալ առաջին բուժօգնության պայուսակ. այսօր լրագրողների հետ հանդիպման ժամանակ խորհուրդ տվեց «Արմենիա» բժշկական կենտրոնի մաշկավեներոլոգ Կարեն Վարդանյանը՝ խոսելով հանգստի ճիշտ կազմակերպման և անցանկալի խնդիրներից խուսափելու հարցերի մասին:
Բժշկի խոսքով` ծովափնյա հանգստի դեպքում առաջնահերթ խնդիր են ուլտրամանուշակագույն ճառագայթները, սակայն չի կարելի միանշանակ պնդել, որ դրանք վնասակար են կամ օգտակար` ամեն ինչ լավ է չափի մեջ: Նա նշեց, որ ցանկալի է արևայրուք ընդունել որոշակի ժամերին` մինչև ժամը 11-ը և 5-6-ից հետո:
«Փոքր տարիքի երեխաներին խորհուրդ չի տրվում արևայրուք ընդունել: Շատերը սխալմամբ կարծում են, թե ջրի մեջ անհնար է այրվածք ստանալ: Հաշվի առնելով ծովափնյա ջրի որոշակի աղտոտվածության մակարդակը` ցանկալի է ծովից հետո ընդունել գոլ լոգանք: Հյուրանոցայն հանգստի դեպքում ցանկալի է ունենալ սեփական սպիտակեղենը»,- մեկնաբանեց մաշկավեներոլոգը:
Նա նկատեց, որ սեպտեմբեր ամսին ավելանում է սեռավարակներով դիմողների թիվը, քանի որ լողափերում կոմերցիոն սեքսով զբաղվող մարդկանց թիվն ավելանում է: Ըստ Կ. Վարդանյանի՝ մեծանում է նաև մի շարք մաշկային խնդիր ունեցողների թիվը` առաջանում են հերպեսներ, սրվում են սնկային հիվանդությունները:
Սեռավարակներից խուսափելու ամենաճիշտ տարբերակը, բժշկի խոսքով, հավատարիմ զուգընկեր ունենալն է: «Չունենալ պատահական սեռական հարաբերություններ, իսկ հակառակ դեպքում պետք է օգտագործել պահպանակներ` անցանկալի խնդիրներից, նաև հղիությունից խուսափելու համար: Մաշկաբորբերից պաշտպանվելու համար կարելի է որոշակի միջոցառումներ իրականացնել»,- ասաց մասնագետը:
Համատեղ ասուլիսի ընթացքում հոգեբան Լիլիթ Բաղդասարյանը տեսակետ հայտնեց, որ սխալ է ամբողջ տարվա հանգիստը թողնել մեկ ամսվա: Նրա համոզմամբ՝ ամբողջ տարի մարդ պետք է կարողանա զուգորդել ծանրաբեռնվածությունը և հանգիստը, որպեսզի ամռանը սպառված չլինի:
«Բավական է երկու շաբաթ հանգիստ` որպեսզի օրգանիզմը լիակատար հանգստանա: Ամենակարճ հանգիստը 3-4 օրն է, 4-14 օրը օպտիմալ հանգստի ժամանակն է»,- մանրամասնեց հոգեբանը:
