Չծննդաբերած և չկերակրած մոր կրծքում 40 տարեկանից հետո խնդիրները շատանում են: Այսօր լրագրողների հետ հանդիպման ժամանակ այս մասին ասաց բժիշկ-ճառագայթաբան Հովհաննես Վարդևանյանը:
Ըստ նրա` նման կարգավիճակ ունեցող կանանց մոտ ավելի է մեծանում կրծքագեղձի քաղցկեղի վտանգը: Սակայն, բժշկի վստահեցմամբ, հիվանդությունը նախաքաղցկեղային փուլում բացահայտվելու դեպքում դրա տարածվելու հավանականությունը շատ քիչ է` փոքրիկ վիրահատական միջամտությամբ կարելի է ազատվել այդ խնդրից:
«Մայրական կողմի ամենամտերիմներից մեկի`քաղցկեղով հիվանդացած լինելը մեծացնում է այդ հիվանդության հավանականությունը: Ցանկացած տիպի քաղցկեղի առաջացման համար գործոն են նաև սթրեսները: Կնոջ ձվարանների ցանկացած փոփոխություն կարող է անդրադառնալ կրծքի վրա: Կարևոր է օրգան-համակարգերի առողջ համախումբը»,- մեկնաբանեց մասնագետը` հավելելով, որ հանդիպում են նաև շատ երիտասարդ հիվանդներ:
Այնպես որ` կրծքում ամենափոքր իսկ կոշտության ի հայտ գալու դեպքում պետք է դիմել բժշկի: Բժշկի խոսքով` արդեն շոշափվող գոյացությունը համարվում է բարձիթողի վիճակ:
