Ամռանն էներգետիկ ծախսը պակասում է , ուստի պետք է ուտել քիչ կալորիա պարունակող ուտելիք: Այսօր լրագրողների հետ հանդիպմանը այս մասին ասաց ՀՀ առողջապահության նախարարության կուրորտաբանության և ֆիզիկական բժշկության գիտահետազոտական ինստիտուտի բժիշկ-սննդաբան Վարդանուշ Պետրոսյանը՝ խոսելով «Ինչպես սնվել ամռան»-ը թեմայի շուրջ:
Ըստ մասնագետի՝ ամռանը օրգանիզմը փոխվում է, և նյութափոխանակությունը արագանում է: Սննդաբանի խոսքով՝ ջերմաստիճանի բարձրացմանը զուգահեռ` կալորիականության քանակը պետք է իջեցվի, պետք է ավելի շատ ուտել միրգ, բանջարեղեն և սննդակարգից պակասեցնել կաթնամթերքը:
«Պետք չէ բացառել միսը, ձուկը, պարզապես օգտագործել ավելի քիչ, ցանկալի է` խոզի, տավարի միսը փոխարինել գառան մսով: Փոխվում է նաև սնվելու ռեժիմը. եթե ընդհանրապես խորհուրդ է տրվում սնվել 3-4 ժամը մեկ, ապա ամռանը Երևանի նման տաք քաղաքում նախաճաշը պետք է լինի 9-10-ը, ճաշը` մինչև կեսօր` 11-12-ը, մինչև ժամը 6-ը կարելի է չուտել»,- մանրամասնեց սննդաբանը:
Մասնագետը առողջ մարդկանց խորհուրդ է տալիս ընդունել մինչև 3 -3,5 լիտր հեղուկ, իսկ զարկերակային ճնշում ունեցողները չպետք է գերազանցեն 3 լիտրը: Վարդանուշ Պետրոսյանը խորհուրդ չտվեց խմել գունավոր գազավորված ըմպելիքներ: Նրա համոզմամբ՝ դրանք նույնիսկ ծարավը չեն հագեցնում:
«Ծարավը ջրազրկման նշան է, պետք չէ սպասել, որ ծարավեք, հետո միայն հեղուկ խմեք: Դրսում պետք է զբոսնել ջրով, ինչից էլ կախված է մեր նորմալ նյութափոխանակությունը»,- նկատեց մասնագետը:
