Ինչպես հաղորդում են Իրանի ռեֆորմիստական շարժման լրատվական կայքերը, Իրանի ազդեցիկ կրոնական առաջնորդներից Այաթոլլահ Զանջանիի երկու որդիները՝ Մուհամադ Մուստաֆան և Սուսանը, ձերբակալվել են Իրանի անվտանգության ծառայությունների կողմից:
Tahavol-e-Sabz լրատվական կայքի հաղորդմամբ, Զանջանիի որդիները փետրվարի 14-ին, իրենց հորը այցելելուց հետո Ղոմ քաղաքից դեպի Թեհրան վերադառնալիս, հետապնդվել են անվտանգության ծառայությունների կողմից։ Երբ նրանք հասել են Սադեղիե հրապարակի մետրոլին, արդեն սկսվել են ժողովրդական ցույցերը: Նույն պահին անվտանգության ծառայությունները, մոտենալով նրանց, երկուսին էլ ձերբակալել են:
Հարկ է նշել, որ Այաթոլլահ Զանջանին համարվում է ռեֆորմիստական շարժման աջակիցներից և վերջին օրերին, ինչպես տեղեկացրել էր «Առաջին լրատվականը», հանդիպումներ էր ունեցել ռեֆորմիստական շարժման առաջնորդների՝ Միր Հուսեյն Մուսավիի և Մեհդի Քարուբիի հետ:
Այաթոլլահ Զանջանին, լսելով իր որդիների ձերբակալման լուրը, հայտարարել է. «Իմ որդիների արյունն ավելի կարմիր չէ, քան մնացած ժողովրդինը»:
