ԱՄՆ-ն Ռուսաստանի Պաշտպանության նախարարության պատվիրակությանը հրավիրել է Խաղաղ օվկիանոսի Կվաջելեյն կղզի ՀՀՊ համակարգի տարրերի փորձարկմանը, սակայն հետո հետ է կանչել հրավերը: Այս մասին գրում է«Կոմերսանտ»-ը՝ վկայակոչելով իր անանուն աղբյուրները:
Թե կոնկրետ երբ է ռուսական կողմը հրավեր ստացել պետքարտուղարությունից և Պենտագոնից, չի նշվում: ԱՄՆ-ն հույս ուներ նման կերպ համոզել Մոսկվային, որ ՀՀՊ համակարգն ուղղված չէ Ռուսաստանի դեմ: Սակայն, թերթի տվյալներով, հրավերը փոխանցվել է բանավոր կերպով: Մոսկվան երկար ժամանակ ուսումնասիրել է հրավերը, սակայն այն արդեն կորցրել է ուժը: Թերթը գրում է, որ հրավերը հետ կանչելուն կողմ է եղել Պենտագոնի ՀՀՊ հարցերով գործակալությունը, որը քննադատում է պետքարտուղարությանըʽ չափից դուրս բաց լինելու համար (Կվաջելեյնի հրաձգարանը համարվում է ԱՄՆ ՊՆ ամենագաղտնի օբյեկտներից մեկը):
Ռուսաստանի ՊՆ աղբյուրը թերթին պատմել է, որ ռուսական կողմը նման այցի համար իմաստ չի տեսնում: «Նրանց օրենքներն արգելելու են մեզ հեռաչափության տվյալներ փոխանցել,- ասել է պարբերականի աղբյուրը:- Գնալ այնտեղ՝ հեռադիտակից նայելու համար, թե իչպես է թռչում հրթիռեը, իմաստ չունի»:
Մոսկվան մտավախություն ունի, որ ԱՄՆ ՀՀՊ-ն կխախտի երկու երկրների միջև ուժերի միջուկային հավասարակշռությունը: ՀՀՊ հարցը Մոսկվայի և Վաշինգտոնի հարաբերությունների ամենասուր թեմաներից մեկն է:
