«Հարսնաքար» ռեստորանում տեղի ունեցած հայտնի միջադեպի վերաբերյալ հարցաշարի թեմայով «Ժառանգություն» կուսակցությունում հավելյալ քննարկումներ չեն եղել: «Առաջին լրատվական»-ի հետ զրույցում այս մասին ասաց կուսակցության անդամ, նախկին պատգամավոր Ստեփան Սաֆարյանը:
Նա նաև տեղեկացրեց, որ նախաձեռնությանը չմիացած «Բարգավաճ Հայաստան» կուսակցությանը իրենք պաշտոնական պատասխան կամ կոչ չեն նախապատրաստում: «Նրանց քաղաքական անհատ գործիչների կողմից «Ժառանգության» վերաբերյալ հայտարարություններ են հնչել, մեր կողմից ևս անհատական պատասխաններ են տրվել: Կարծում եմ՝ սրանով ամեն ինչ ասված է»,- նշեց Ստեփան Սաֆարյանը:
Հիշեցնենք, որ ԱԺ մի քանի խմբակցություններ` ՀՅԴ-ն, «Ժառանգություն»-ն ու ՀԱԿ-ը, «Հարսնաքար» ռեստորանում տեղի ունեցած հայտնի միջադեպի վերաբերյալ հարցաշարով օրերս դիմել էին ՀՀ կառավարությանը և ՀՀ գլխավոր դատախազությանը: «Բարգավաճ Հայաստան» խմբակցությունը նախաձեռնությանը չէր միացել:
Հարցաշարում ներառված են այնպիսի հարցեր, ինչպիսիք են՝
1. Ե՞րբ և ո՞ւմ կողմից է ոստիկանությունում ահազանգ ստացվել դեպքի մասին: Ինչու՞ մի քանի օր ծանր վնասվածք ստացած սպայի գործով քրեական գործ անհապաղ չի հարուցվել, իսկ նյութերը մի քննչական մարմնից մյուսն են դեգերել:
2. Հայտնի՞ են «Հարսնաքար»-ում տեղի ունեցած միջադեպի բոլոր մասնակիցները, կա՞ն դեպքի այլ ականատեսներ, որոք դեռ հարցաքննված չեն:
3. Հանցագործության կատարման տեղանքներում կա՞ն տեսանկարահանման սարքավորումներ, որոնք արձանագրել են դեպքը: Եթե չեն պահպանվել տեսագրությունները, ապա ինչպե՞ս է դա բացատրվում և այլն: