Ադրբեջանական Trend լրատվական գործակալությունը՝ վկայակոչելով «Ազատություն» ռադիոկայանի ռուսական ծառայությանը, հայտնում է, որ Լոնդոնի Օլիմպիական խաղերում ոսկե մեդալի համար ամենամեծ դրամական պարգևը սահմանել է Վրաստանը՝ 1.2 միլիոն դոլար: Երկրորդ տեղում Ադրբեջանն է՝ 510,000 դոլար:
Արծաթե մեդալի համար Վրաստանում հատկացնելու են 300,000, իսկ բրոնզե մեդալի համար՝ 200,000 դոլար: Արծաթե ու բրոնզե մեդալների հարցում Ադրբեջանը դարձյալ երկրորդն է՝ համապատասխանաբար 225,000 և 128,000 դոլար:
Ոսկե մեդալի համար սահմանված պարգևավճարի հարցում երրորդ տեղում Ղազախստանն է՝ 250,000 դոլար: Համեմատության համար պետք է նշել, որ ԱՄՆ-ում ոսկե մեդալ նվաճած մարզիկը ստանալու է 25,000 դոլար, Ռուսաստանում՝ 125,000 դոլար, Իտալիայում՝ 172,200 դոլար, Ուկրաինայում՝ 100,000 դոլար, Բելառուսում՝ 150,000 դոլար, Գերմանիայում՝ 18,300 դոլար:
