Լոնդոնյան բարում պատահաբար կոտրել են 1788 թվականի արտադրության Clos de Griffier Vieux կոնյակի շիշը: Խմիչքն արժե 55 հազար ֆունտ ստեռլինգ (ավելի քան 77,5 հազար դոլար): Կոնյակը չէր ապահովագրվել, քանի որ արդեն բացված էր: Այս մասին հաղորդում է The Huffington Post-ը:
Միջադեպը տեղի է ունեցել մի քանի օր առաջ, երբ կոնյակի փորձագետ և կոկտեյլների պատրաստման մասնագետ Սալվատորե Կալաբրեզեն պատրաստում էր Old and Wise կոկտեյլը: Դրա պատրաստման համար նրան անհրաժեշտ էր հենց այդ կոնյակը: Արդյունքում նա պետք է ստանար աշխարհի ամենաթանկ ըմպելիքը: Այդ միջոցառմանը մասնակցել են Գինեսի ռեկորդների գրքի ներկայացուցիչները:
Երեկույթի ժամանակ ակումբի այցելուներից մեկը պատվիրել է 5000-ական ֆունտ արժողությամբ երկու բաժին Clos de Griffier Vieux կոնյակ: Այնուհետև հաճախորդը բարմենին խնդրել է իրեն տալ շիշը` պիտակն ուսումնասիրելու համար: Սակայն տղամարդը չի պահել շիշը, այն ընկել է գետնին: Old and Wise-ի պատրաստումը դադարեցվել է:
Կալաբրեզեի խոսքով՝ դրանից հետո բարում բոլոր քարացել էին: «Իմ սիրտը կոտրված է: Մենք պատմության մի մաս կորցրինք»,- ասել է նա: Ավելի ուշ նա Twitter-ի իր միկրոբլոգում գրել է, որ այդ միջադեպի պատճառով բարի հատակը դարձել էր «աշխարհի ամենաթանկ հատակը»:
224 տարեկան կոնյակով պատրաստված Old and Wise կոկտեյլի մեկ բաժակը պետք է արժենար 5050 ֆունտ:
