ԱԺ կրթության, գիտության և երիտասարդական հարցերով մշտական հանձնաժողովում այսօր քննարկվում է ՀՀ կրթության զարգացման 2011-2015 թվականների պետական ծրագիրը: Հանձնաժողովի նախագահ Արտակ Դավթյանը իր խոսքում նշեց, որ տասը տարիների ընթացքում կրթության բնագավառը օրենսդրական առումով բավականին ակտիվ է եղել:
Դավթյանը տեղեկացրեց, որ վերոնշյալ ծրագիրը, ԱԺ կանոնակարգ օրենքի համաձայն, քննարկվելու է երկրորդ ընթերցմամբ: Դավթյանը նաև նշեց,որ այսօրվա քննարկմանը պետք է մասնակցեր նաև ԱԺ նախագահ Հովիկ Աբրահամյանը, որը, սակայն, աշխատանքային հրատապ խնդիրների պատճառով չի կարողացել ներկա լինել:
Կրթության և գիտության նախարար Արմեն Աշոտյանը, խոսելով ծրագրի մասին, նշեց, որ սա երկրորդն է մեր պետության պատմության ընթացքում: Աշոտյանի խոսքերով, ծրագիրը ելակետ է մոտակա հինգ տարիների ընթացքում կրթության զարգացման համար:
«Սա մեր կրթության ապագայի տեսլականն է, կրթության բնագավառում գործող սկզբունքները և մեզ սպասվող մարտահրավերները»,- ասաց նախարարը:
