Լիբիական Բենղազի քաղաքում տեղի են ունեցել բախումներ, որոնք ծագել են ընդդիմադիր գործչի ձերբակալությունից հետո: Այս մասին հայտնել է Rreuters գործակալությունը:
Ի տարբերություն այս հաղորդագրության, Լիբիայի պետական հեռուստատեսությունը տեղեկացրել է միայն, որ երկրի տարբեր մասերում առանձին ելույթներ են եղել ի պաշտպանություն Լիբիայի նախագահ Մուամմար Քադաֆիի:
Բենղազիում հրատարակվող Quraniya թերթը գրում է, որ ցուցարարները զինված են եղել քարերով և «Մոլոտովի կոկտեյլներով»: Հիմնական բախումը ոստիկանության հետ տեղի է ունեցել քաղաքի Շաջարա հրապարակում: Ըստ թերթի՝ վիրավորվել է 14 մարդ, այդ թվում` 10 ոստիկան: Ըստ ականատեսների՝ ցույցերին մասնակցել է մոտ 1000 մարդ:
BBC-ն հայտնում է երկու հազարի չափ ցուցարարների մասին: Նաև նշվում է, որ թեպետ ընդդիմադիր գործչին ազատ են արձակել, սակայն բախումները շարունակվել են:
Հիշեցնենք, որ երեկ մի խումբ մտավորականներ բաց նամակ էին ուղղել երկրի ղեկավար Մուամամ Քադաֆիին` կոչ անելով հեռանալ, ինչպես նաև չճնշել փետրվարի 17-ին նախանշված բողոքի ցույցերը: