ИТАР-ТАСС-ի փոխանցմամբ՝ Իսրայելը Թուրքիային առաջարկել է կարգավորել երկու երկրների փոխհարաբերությունները: Իսրայելի վարչապետ Բենիամին Նեթանյահուն հայտարարել է, որ տարածաշրջանում աճող անկայունությունը պահանջում է Իսրայելի ու Թուրքիայի միջև հարաբերությունների կարգավորում: Այս մասին նշված է կառավարության ղեկավարի գրասենյակի տարածած հայտարարության մեջ.
«Թուրքիան և Իսրայելը տարածաշրջանի երկու կարևոր, հզոր ու կայուն պետություններն են: Մենք պարտավոր ենք ուղիներ գտնել՝ վերականգնելու համար ավելի վաղ ունեցած հարաբերությունների մակարդակը: Դա հատկապես կարևոր է ներկայումս՝ տարածաշրջանի ընդհանուր իրավիճակի կայունացման նպատակով»:
Նեթանյահուի հայտարարության մեջ ոչինչ չի ասվում թուրքական պահանջների մասին՝ «Մավի Մարմարայի» միջադեպի վերաբերյալ ներողություն խնդրել ու փոխհատուցում վճարել: Իսրայելական ռադիոն Նեթանյահուի այս հայտարարությունը պայմանավորում է սիրիական զարգացումներով՝ ընդգծելով, որ այդ երկիրը սահմանակցում է թե՛ Իսրայելի, թե՛ Թուրքիայի հետ:
Հիշեցնենք, որ Իսրայելի արտգործնախարար Ավիգդոր Լիբերմանը թուրքական ԶԼՄ-ներին հայտարարել է, որ եթե Իսրայելը «Մավի Մարմարայի» միջադեպի վերաբերյալ ներողություն խնդրի Թուրքիայից, ապա ինքը հրաժարական կտա:
