ՃՈ հատուկ պահպանման տարածքում կաղնու մի ճյուղ պոկվել և ընկել է տուգանային հրապարակում կայանված ավտոմեքենաների վրա (լուսանկարներ)

Այսօր՝ հուլիսի 24-ին Ճանապարհային ոստիկանության հատուկ պահպանման տարածքում («Գայի պլաշադկա»), ժամը 18.00-ի սահմաններում ուժեղ քամու հետևանքով հաստաբուն կաղնու մի ճյուղ պոկվել և ընկել է տուգանային հրապարակում կայանված «ԲՄՎ 525» մակնիշի 45 AՏ 555 համարանիշի, «Համմեր» մակնիշի 19 DR 999 համարանիշի, «ՎԱԶ 21 115» մակնիշի Լ 3943 համարանիշի և «ՎԱԶ 2106» մակնիշի 63 ՕՕ 254 համարանիշի ավտոմեքենաների վրա:

Այս պահին նշված վայր են ժամանել Երևանի քաղաքապետարանի բնապահպանության վարչության պետ Ավետ Մարտիրոսյանի գլխավորած խումբը՝ «Կենտրոն կանաչապատում» ՓԲԸ աշխատակիցների հետ:

Ժամանել է նաև Արտակարգ իրավիճակների նախարարության հատուկ փրկարարական ջոկատի 2-րդ խումբը, որի աշխատակիցները ձեռքի սղոցներով հնարավորինս հեռացրել են ճյուղերի մի մասը:

Երևանի քաղաքապետարանի բնապահպանության վարչության պետի հանձնարարականով արդեն դեպքի վայր է ժամանում հատուկ խումբ, որպեսզի հատուկ տեխնիկայի միջոցով հնարավոր լինի ավտոմեքենաների վրայից հեռացնել ճյուղերը:

Ֆոտոլրագրող Գագիկ Շամշյանը News.armeniatv.com-ին հայտնել է, որ նշված տարածքում կան մի քանի ծառեր, որոնք իրենցից մեծ վտանգ են ներկայացնում, և, եթե աշխատանքներ չկատարվեն ծառերը էտելու ուղղությամբ, ապա չի բացառվում, որ նման դեպք նորից կրկնվի:

Ճանապարհային ոստիկանությունը պատրաստվում է դիմել Երևանի քաղաքապետարանի համապատասխան ծառայություն և թույլտվություն ստանալուց հետո «Կենտրոն կանաչապատում» ՓԲԸ-ի աշխատակիցները կկատարեն նշված վտանգը կանխելու ուղղությամբ համապատասխան աշխատանքներ: 

Ըստ մասնագետների՝ նշված ծառերը ավելի քան 300 տարվա ծառեր են:

Ֆոտոլրագրողը հայտնել է նաև, թե ով է փոխհատուցելու ծառի ճյուղի կոտրվելու հետևանքով հասցված վնասը, դեռևս հայտնի չէ:

Դեպքի վայր է ժամանել նաև Ոստիկանության Մալաթիա-Սեբաստիա բաժնի քննիչ Դավիթ Մանուկյանը, ում կողմից փաստի առթիվ նյութեր են նախապատրաստվում:

Գ. Շամշյանը հայտնել է, որ նշված ծառը նույնիսկ անուն ունի. ճանապարհային ոստիկաններն այն անվանում են «Ուզբոյի ծառ»:

 

Լուսանկարները՝ Գագիկ Շամշյանի