Ադրբեջանական Turan լրատվական գործակալության փոխանցմամբ՝ Ադրբեջանի քաղաքացիական ավիացիայի պետական վարչակազմը հայտարարություն է տարածել, որում անդրադարձել է ԼՂՀ-ում կառուցված նոր օդանավակայանի շահագործման խնդրին.
«Լեռնային Ղարաբաղում այդ օդանավակայանը միակողմանիորեն շահագործման հանձնելուն ուղղված հայկական կողմի փորձերը գնահատվելու են որպես Ադրբեջանի օդային տիրույթի խախտում: Առանց ադրբեջանական կողմի թույլտվության՝ որևէ օտար ինքնաթիռ չի կարող թռչել Ադրբեջանի տարածքով: Եթե իրականացվի այդպիսի թռիչք, ապա դա կհամարվի սահմանի խախտում և կձեռնարկվեն համապատասխան միջոցներ»:
Հիշեցնենք, որ նախորդ շաբաթ ԵԱՀԿ Մինսկի խումբն իր տարածաշրջանային այցից հետո հայտարարություն էր տարածել, որում վերահաստատել էր, որ Լեռնային Ղարաբաղի օդանավակայանի գործունեությունը չի կարող դիտարկվել որպես Լեռնային Ղարաբաղի կարգավիճակի փոփոխում, և կողմերին կոչ էր արել գործել միջազգային իրավունքի նորմերին և իրենց տարածքում թռիչքների հետ կապված գործող պրակտիկային համապատասխան.
«Լեռնային Ղարաբաղում նոր օդանավակայանի բացման ծրագրի հետ կապված՝ համանախագահները կողմերից հավաստիացումներ են ստացել, որ նրանք զերծ կմնան քաղաքացիական ինքնաթիռների նկատմամբ սպառնալիք և ուժ գործադրելուց, և որ այդ հարցը կլուծեն դիվանագիտական ճանապարհով՝ առանց քաղաքականացնելու այն»:
