Աֆղանական ոստիկանության ջոկատները երկրի արևմուտքում՝ Ֆարահ մարզում, անցել են «Թալիբանի» կողմը,- հաղորդում է BBC-ն: Նրանց թվում են ոստիկանության պետը և 13 կրտսեր սպա, որոնք պատասխանատու էին տեղի վերահսկիչ անցակետերից մեկի համար: Դեպքը տեղի է ունեցել հուլիսի 22-ին, սակայն ԶԼՄ-ները դրա մասին իմացել են միայն այժմ:
Դասալքած ոստիկաններն իրենց հետ տարել են ծանր սպառազինություն՝ նռնականետեր և ականանետեր: Բացի այդ, նրանք հեռացել են ծառայողական մեքենաներով, որոնց թվում եղել են ամերիկյան բանակային HMMWV զրահամեքենաներ:
Անցակետը գտնվում է Շևան գյուղում: Այնտեղ տեղակայված է եղել 20 սպա: Ֆարահի ոստիկանների և հատուկ ծառայությունների տեղեկացմամբ՝ ոստիկանության պետը թունավորել է իր 7 ենթականերին, որոնք հրաժարվել են փախչել իրենց հետ:
Հատուկ ծառայությունները կասկածում են, որ ոստիկանության պետը սկսել է թալիբների հետ համագործակցել նախքան իր դասալքությունը՝ նրանց գաղտնի տեղեկություն փոխանցելով: Ֆարահ մարզը համարվում է Աֆղանստանի արևմուտքի ամենաանկայուն շրջաններից մեկը, որտեղ վերջին շրջանում ակտիվացել են զինյալները:
