Նովգորոդի շրջանային դատարանը հրապարակել է ոստիկանին սպանած երկու ավտոաառևանգիչների դատավճիռը: Այս մասին տեղեկացնում է РАПСИ-ին:
26-ամյա Գուրգեն Ղամբարյանին դատապարտել են 25 տարվա ազատազրկման, իսկ 30-ամյա Մոհամեդ Ումարովին` 24 տարվա: Ազատ արձակվելուց ևս 2 տարի նրանց ազատությունը որոշ չափով սահմանափակված կլինի: Բացի այդ, նրանց պարտավորեցրել են 250.000-ական ռուբլի տուգանք վճարել սպանվածի հարազատներին:
Великий Новгород գործակալության տեղեկատվության համաձայն՝ Ղամբարյանի և Ումարովի հետ միասին դատապարտել են նաև Եպանեշնիկով ազգանվամբ մի տղամարդու, որը նրանց հետ մի շարք առևանգումներ է իրականացրել: Եպանեշնիկովը սպանության հետ առնչություն չի ունեցել. նրան դատապարտել են երեք տարվա ազատազրկման:
Պարզվել է, որ 2011թ.-ի հուլիսի 15-ին Սոլցի քաղաքում Ումարովը և Ղամբարյանն առևանգել են «Վազ 2105» մակնիշի մի ավտոմեքենա: Նրանք շարժվել են Նովգորոդի ուղղությամբ, սակայն Շիմսկ գյուղի մոտ նրանց փորձել է կանգնեցնել պարեկ Վիկտոր Եկիմովը, որը սկսել է հետապնդել: Հանցագործները թողել են ավտոմեքենան և փորձել փախչելով թաքնվել: Եկիմովը, սակայն, կարողացել է հասնել և նրանցից մեկին տապալել գետնին: Սակայն վերջինիս օգնության է հասել նրա համախոհը: Նրանք երկուսով խլել են ոստիկանի զենքը, նրան նստեցրել պահակապարեկային մեքենայի ետևի նստելատեղին, սակայն ոստիկանը շարունակել է դիմադրություն ցույց տալ, ինչի արդյունքում հրազենով սպանել են նրան: Հետո վերցրել են նրա ռադիոկապը, բջջային հեռախոսը, փողերը և անհետացել Սոլցիում:
Եկիմովը հասցրել է մինչեւ մահանալը օգնության հարցում ուղարկել: Դեպքի վայր հասած ոստիկանները տեսել են պարեկի դիակը և հետաքննություն սկսել: Ումարովին և Ղամբարյանին գտել են Սոլցիում. նրանց ձերբակալելու համար ստիպված են եղել զենք կիրառել:
Ձերբակալությանը մասնակցողներին արժանացրել են պետական պարգևների, իսկ Եկիմովին հետմահու պարգևատրել են Արիության մեդալով:
Միաժամանակ ՆԳՆ տարածաշրջանային գլխավոր վարչությունը ստուգումներ է անցկացրել` պարզելու տեղի ունեցածին առնչվող պատճառները: Ստուգման արդյունքում ավելի քան 30 աշխատակիցներ ենթարկվել են կարգապահական պատասխանատվության:
Թարգմանությունը` Էլմիրա Մարտիրոսյանի
