Սիրիայի ազատ բանակի սպաները կիրակի՝ Հալեպի «ազատագրման» համար մարտերից առաջ, հայտարարել են, որ կպաշտպանեն քաղաքի կրոնական և ազգային բոլոր փոքրամասնություններին:
Ինչպես հաղորդվում է եգիպտական Al-Ahram թերթի կայքում, YouTube վիդեոհոսթինգում տեսանյութ է տեղադրվել, որում Սիրիայի ազատ բանակի գնդապետ Աբդել Ջաբար Ալ-Օքայդին հայտարարում է, որ «սկսվում է Հալեպի ազատագրումը Ասադի ավազակախմբերի արյունոտ ձեռքերից»: Օքայդին հայտարարել է, որ Սիրիայի ազատ բանակը կպաշտպանի բոլոր քաղաքացիներին, այդ թվում «փոքրամասնություններին՝ քրիստոնյաներին, հայերին, ասորիներին, քրդերին, ալաուիներին, շիաներին և դրուզներին»:
Պարբերականն ընդգծում է, որ Հալեպի հին քաղաքը համարվում է մի շարք կրոնական փոքրամասնությունների, առավելապես քրիստոնյաների և հայերի ծննդավայրը:
Անդրադառնալով ալաուիներին, գնդապետը նշել է, որ նրանք վախենալու կարիք չունեն, քանի որ իրենց պայքարն ուղղված է միայն Ասադի ընտանիքի դեմ:
Հիշեցնենք. Սիրիայի ընդդիմության զինված ջոկատները քաղաքի մատույցների մոտ մարտեր են մղում կառավարական զորքերի հետ: Հյուսիսային ուղղությամբ նրանց հաջողվել է հասնել քաղաքային գծի սահմանին և գրոհել տեղի անվտանգության մարմինների գրասենյակը:
Բացի այդ, ապստամբները գրավել են Հալեպից 10 կմ հյուսիս տեղակայված ուսումնական զինվորական զորամասը, որտեղ զինվորների մի մասը պատանդ են վերցվել, մյուս մասն անցել է ընդդիմության կողմը:
Հալեպում մարտերը շարունակվում են քաղաքների փողոցներում: Ապստամբների տվյալներով՝ բախումների ժամանակ իրենց հաջողվել է խլել հակառակորդի մի քանի տանկ:
Բացի այդ, ըստ ապստամբների՝ իրենց հաջողվել է գրավել Թուրքիայի հետ սահմանակից ևս մեկ շրջան՝ Բաբ Ալ-Սալամը, որը նույնպես գտնվում է Հալեպից հյուսիս:
