Պաղպաղակի արտահանումը Հայաստանում չի կարող դիտարկվել լուրջ արդյունաբերական ճյուղ: Նման տեսակետ «Առաջին լրատվական»-ի հետ զրույցում հայտնեց Հայաստանի արդյունաբերողների և գործարարների միության նախագահ Արսեն Ղազարյանը:
«Ժամանակին մենք շատ էինք ոգևորված, ես գեղեցիկ եռյակ էի ասում` «Թամարան», «Շանթը», «Աշտարակը», հետո «Գրանդ Քենդին» մտավ շուկա, հետո ավելացան, և այսօր կաթնամթերք արտադրող գրեթե բոլոր ձեռնարկությունները պաղպաղակ են արտադրում: Դա արտահանման տեսակետից արդյունաբերական ճյուղ չի, բայց հոգու բրենդ է»,- ասաց Ա. Ղազարյանը` պարզաբանելով, որ հնարավոր չէ «Նեստլեի» հետ տարբեր շուկաներում մրցակցել այն դեպքում, երբ անհրաժեշտ քանակությամբ կաթ չենք կարողանում արտադրել:
Նա փաստեց, որ շատերը կաթի փոշի են օգտագործում, ինչը նորմալ է: Ներկայում պաղպաղակ արտահանվում է ԱՄՆ, ՌԴ, և դա կշարունակվի, քանի որ այնտեղ հայ համայնքները շատ կարևորում են հայկականը:
Ա. Ղազարյանի խոսքով՝ լուրջ պոտենցիալ կա ձկնարտադրության մեջ` արտահանում ենք ձուկ, խեցգետին և խավիար, ավելի շատ, քան մեր ծով ունեցող հարևանները, և այսօր դրանց ծավալներն ավելացվում են:
