«Առաջին լրատվական»-ի տեղեկություններով` մոտ երկու ամիս առաջ ազատ է արձակվել Երևանի «Ուրարտու» ռեստորանային համալիրի սեփականատեր Աշոտ Երիցյանը: Շրջանառվող լուրերի համաձայն` դա արժեցել է 70.000 դոլար, իսկ դրանում գործուն մասնակցություն է ունեցել ՀՀ փոխոստիկանապետ Գագիկ Համբարձումյանը:
Հիշեցնենք, որ այս տարվա փետրվարի 6-ին ոստիկանության քննչական գլխավոր վարչության Երևան քաղաքի վարչության կենտրոնականի քննչական բաժնի քննիչի միջնորդությամբ Կենտրոն և Նորք-Մարաշ վարչական շրջանների ընդհանուր իրավասության դատարանը Ա. Երիցյանի նկատմամբ որպես խափանման միջոց էր ընտրել կալանքը, քանի որ նա կասկածվում էր անձի առևանգման մեջ:
Տարեսկզբին մամուլում հայտնված տեղեկությունների համաձայն՝ Աշոտ Երիցյանը՝ իր ընկերների հետ, հունվարի 2-ին, ժամը 21.00-ի սահմաններում, Երևանի Պարոնյան փողոցի վրա գտնվող «Մասկարադ» կարաոկե-ակումբից խաբեությամբ առևանգել էր Երևանի Շերամի 89 շենքի բնակիչ 24-ամյա Արտակ Գրիգորյանին, գցել մեքենայի բեռնախցիկը, տարել անհայտ ուղղությամբ, ապա ծեծի ենթարկել:
Փաստի առթիվ հարուցվել էր քրեական գործ ՀՀ Քրեական օրենսգրքի 133 հոդվածի 2-րդ մասի 1-ին կետի (անձին ազատությունից ապօրինի զրկելը, որը կատարվել է մի խումբ անձանց կողմից նախնական համաձայնությամբ) հատկանիշներով:
Մամուլի տեղեկություններով` պատճառը եղել է այն, որ անհայտ անձը sms է գրել մի աղջկա, ով, ըստ ամենայնի, ծանոթ է եղել «Ուրարտու» ռեստորանի տնօրենին: Հաղորդագրությունից հետո Երիցյանը գտել է հաղորդագրության հեղինակին, ծեծել է, ապա գցել մեքենայի բեռնախցիկն ու տարել անհայտ ուղղությամբ: Իսկ հաղորդագրություն ստացած աղջիկը եղել է դեռևս խորհրդային շրջանում հայտնի «մաֆիոզ Գագոյի» աղջիկը՝ Քրիստինեն, ով Պռոշյանի փողոցում՝ «Ուրարտու» ռեստորանից մոտ 50 մ հեռավորության վրա գտնվող «Մասկարադ» կարաոկեի սեփականատերն է:
