Ամերիկյան նավթային Chevron ընկերությունը պայմանավորվել է Իրաքի քրդական հատվածում երկու երկրաբանական բլոկների գնման շուրջ, որոնք հարուստ են նավթով: Այս մասին հայտնում է Associated Press-ը:
Այս որոշումը կարող է հարուցել պաշտոնական Բաղդադի դժգոհությունը, քանի որ վերջինս վաղուց կոնֆլիկտի մեջ է քրդերի հետ հատկապես նրանց տրամադրության տակ գտնվող նավթի պաշարների արդյունահանման իրավունքների ու ածխաջրածնային եկամուտների բաշխման առնչությամբ:
Chevron-ը այդ բլոկներում մասնաբաժին ձեռք կբերի հնդկական Reliance ընկերությունից: Բլոկները տեղակայված են Իրաքի Քրդստանի մայրաքաղաքից` Էրբիլից հյուսիս:
Այդկերպ Chevron-ը դառնում է ամերիկյան երկրորդ ընկերությունը, որը շրջանցում է Իրաքի կենտրոնական կառավարությանը` պայմանագիր կնքելով քրդերի հետ` առանց Իրաքի համաձայնության:
2011 թ. հոկտեմբերին այդպես էր վարվել նաև Exxon Mobil-ը: