«Ամերիաբանկը», համաձայն իր որդեգրած քաղաքականության, մասնաճյուղեր բացելիս ընդհանրապես որևէ կառույց ձեռք չի բերում, որպես սեփականություն կամ չի գնում տարածք` մասնաճյուղ կառուցելու նպատակով: Մասնաճյուղեր բացելիս «Ամերիաբանկ»-ը միմիայն վարձակալում է արդեն իսկ կառուցված շինություն կամ դրա որևէ հատված, որն էլ վերանորոգում է իր բրենդային ոճին համապատասխան:
Այս մասին «Առաջին լրատվական»-ին պարզաբանեցին «Ամերիաբանկ»- ի հասարակության հետ կապերի և հաղորդակցման խմբից` պատասխանելով հարցին` արդյո՞ք բանկը նախատեսում է մասնաճյուղ կառուցել Գյումրու կենտրոնական Վարդանանց հրապարակի ու Շահումյան 188 շենքն իրար միացնող հատվածում կանաչ տարածքի հաշվին:
Բանկից մեզ նաև հայտնեցին, որ «Ամերիաբանկ»-ն իր ռազմավարական պլանով նախատեսել է Գյումրիում մասնաճյուղի բացում և փնտրում է վարձակալությամբ տրամադրվող կառույց: « «Ամերիաբանկ»- ի հասարակության հետ կապերի և հաղորդակցման բաժնից ասացին, որ ներկայումս կան տարբեր առաջարկներ, սակայն բանկը դեռևս ընտրություն չի կատարել, հետևաբար « Ամերիաբանկ»-ի անվան հետ Գյումրիում որևէ տարածք չի կարող կապվել:
Հիշեցնենք, որ բավական ժամանակ էր, ինչ խոսակցություններ կային, որ Գյումրու կենտրոնական Վարդանանց հրապարակն ու Շահումյան 188 շենքն իրար միացնող հատվածում «Ամերիաբանկ» ՓԲԸ-ն մտադրվել է կառուցել իր մասնաճյուղը: Այս հարցը հարուցել էր Գյումրիի բնակիչների անհանգստությունը, քանի որ նրանցից ոմանց փաստմամբ, քաղաքի գլխավոր հատակագծով ու գոտիավորման նախագծով այն կանաչ տարածք է:
