Արցախում շարունակվում են նախագահական ընտրությունները: Մինչև օրվա երկրորդ կեսը բնակչության մասնակցությունն ընտրություններին շատ ակտիվ էր: Օրվա երկրորդ կեսից հետո, սակայն, ընտրողների հոսքը ընտրատեղամասեր նվազեց: «Առաջին լրատվական»-ի հետ զրույցում Ստեփանակերտի ընտրական տեղամասերի ղեկավարներից ոմանք այդ պասիվությունը պայմանավորեցին տեղումներով:
«Անձրևը մի փոքր խանգարեց, բայց մենք դեռ հույս ունենք, որ ակտիվությունը կվերականգնվի»,- մեզ հետ զրուցում նշեց թիվ 16 ընտրական տեղամասի ղեկավար Աիդա Ավագյանը:
ԼՂՀ մայրաքաղաք Ստեփանակերտի բնակչության մի մասը մեծ սպասելիքներ ունի ընտրություններից, ասում են, որ իրենց ձայնը դարձյալ Բակո Սահակյանին են տվել: Մարդկանց մի մասն էլ նշում է, որ առանձանպես մեծ հույսեր չկան, որ ընտրություններն ինչ-որ դրական զարգացումներ են բերելու արցախցու կյանք: Մարդիկ դժգոհում են թանկացումներից, գործազրկությունից, զոհված զինծառայողների ընտանիքերը սպասում են պետության խոստացած բնակարաններին:
Ոմանք նշեցին, որ չեն հավատում, թե արդար ու թափանցիկ ընտրություններ են անցկացվելու: Ստեփանակերտի բնակիչները նշում են, որ հատկապես գյուղերում մինչև օրվա վերջ մի շարք խախտումներ կարձանագրվեն: «Մեկ է՝ իրանք իրանց ընտրելու են, ժողովրդի ձայնը չի անցնում»,- դժգոհեց Ստեփանակերտի բնակիչներից մեկը:
Միջազգային շուրջ 80 դիտորդներ՝ 21 տարբեր երկրներից, հետևում են Արցախի ընտրությունների ընթացքին: Առայժմ դիտորդները զերծ են մնում մեկնաբանություններ տալուց: Նրանք ընտրությունների ավարտին հանդիպելու են լրագրողներին:
Նախագահի թեկնածու Վիտալի Բալասանյանի շտաբը հասցրել է խախտում արձանագրել: Շտաբի պետ Էդուարդ Աղաբեկյանը տեղեկացրեց, որ Շահումյանի շրջանի գյուղերից մեկի ընտրատարածքում Բալասանյանի վստահված անձը նկատել է, որ տեղամասային ընտրական հանձնաժողովի նախագահ Արմինե Հովհաննիսյանը 2 հոգու հետ քվեախուց է մտել: Այս խախտումը վստահված անձը նկարահանել է: Էդուարդ Աղաբեկյանի տեղեկացմամբ՝ Վիտալի Բալասանյանի վստահված անձանցից մեկի նկատմամբ նաև բռնություն է կիրառվել:
Լուսանկարը՝ PanARMENIANPhoto-ի
