«2012 թվականի խորհրդարանական ընտրությունները պատմության մեջ ամրագրվեցին Հանրապետության հրապարակում փուչիկների պայթյունի հետևանքով բռնկված հրդեհով: Ամիսների տքնաջան աշխատանքը մի քանի վայրկյանում, բառի բուն իմաստով, հօդս ցնդեց մոտ յոթ հազար փուչիկի պայթյունի տեսքով: Երկրի նախագահի ղեկավարած կուսակցության քարոզչական եզրափակիչ համերգի մասին լուրը հատեց երկրի սահմանները, միջազգային լրատվամիջոցներով լուսաբանվեց ընտրության շեմին պայթած «նաֆսի» տեսքով»,- գրում է «Հրապարակ»-ը և հավելում.
«Ողջ աշխարհին հայտնիմանուկ հանդիսատեսի կյանքի հաշվին՝ մեծաքանակ փուչիկները լիցքավորելով մեթան գազով, որի պայթյունի հետևանքով կարող էին լինել նաև զոհեր: Սովորաբար փուչիկները լիցքավորում են հելիում տեսակի գազով, ինչն անվնաս է, բայց համեմատաբար թանկ: Հիշեցնենք, որ այս պայթյունի հետևանքով 150 հոգի տարբեր աստիճանի այրվածքներ էին ստացել, կային տուժածներ, ովքեր հրաշքով փրկվեցին: Արտասահմանից բժիշկներ բերեցին՝ խոր վնասվածքները պլաստիկ վիրահատելու և այրվածքները բուժելու համար: Նշենք, որ բռնկված հրդեհի վտանգավորությունը հատկապես փուչիկների մեծ քանակով էր պայմանավորված, ինչով էլ ՀՀԿ-ն որոշել էր զարմացնել հայ հանրությանը:
Ինչևէ, մայիսի 4-ից մինչ օրս շարունակվում է նախաքննությունը, և միայն երեկ է հայտնի դարձել մեղադրյալի ով լինելը: Ոստիկանության Քննչական գլխավոր վարչության հատկապես կարևոր գործերի քննչական բաժնի պետ Արսեն Այվազյանը մեզ հետ զրույցում ասաց, թե այդ գործով մեղադրանք է առաջադրվել Սերոբ Բոզոյանին` Քրեական օրենսգրքի 279-րդ հոդվածի (Անվտանգության պահանջներին չհամապատասխանող ապրանքներ թողարկելը կամ իրացնելը) 2-րդ մասով (Վնաս պատճառել երկու կամ ավելի մարդկանց առողջությանը):
Երեկ մեղադրյալ Սերոբ Բոզոյանի նկատմամբ, որպես խափանման միջոց, կիրառվել է ստորագրությամբ չբացակայելը: Արսեն Այվազյանը սահմանափակվեց այսքանով: Սակայն ավելի ուշ մեզ հաջողվեց պարզել, որ Սերոբ Բոզոյանը 54 տարեկան է և զբաղվում է փուչիկների լիցքավորմամբ: Կազմակերպություն չունի և ինքն է անձամբ ընդունում պատվերներ: Որոշ տեղեկությունների համաձայն` նա փոքրաթիվ պատվերներ է ընդունում, ինչից կարելի է ենթադրել, որ իշխանության պատվերի գայթակղությանը դժվարացել է դիմադրել: Ամեն դեպքում, առայժմ մեղադրվում է Բոզոյանը: Ինչպես տեսնում եք, իշխող կուսակցության ներկայացուցիչներից ոչ մեկին մեղադրանք չի առաջադրվել՝ այն դեպքում, երբ նրանք են փնտրել ու գտել էժան փուչիկի աղբյուրը և շատ էլ լավ տեղյակ են եղել, որ կրակի դեպքում կարող էր հրդեհ բռնկվել»
