Արաբական Միացյալ Էմիրությունների ափերին ԱՄՆ ռազմածովայի ուժերի կողմից գնդակոծության ենթարկված հնդիկ ձկնորսները հայտարարում են, որ որևէ նախազգուշացում չեն ստացել ռազմանավի մոտենալու վերաբերյալ,- հաղորդում է CNN-IBN հեռուստաալիքը:
Դեպքը տեղի է ունեցել երկուշաբթի. ամերիկացի զինվորները կրակ են բացել ձկնորսական նավի վրա՝ կարծելով, որ անհայտ նավը կարող է իրենց համար վտանգ ներկայացնել: Ձկնորսական նավում եղել են անձնակազմի 8 անդամները, որոնցից 6-ը հնդիկներ են: Հնդիկներից մեկը մահացել է, երեքը՝ վիրավորվել:
«Մենք այդ նավից ոչ մի նախազգուշացում չենք ստացել: Մենք ավելացրինք արագությունը՝ նրանցից առաջ անցնելու համար, և հանկարծ մեզ վրա կրակ բացեցին: Մենք գիտենք և՛ նախազգուշական ազդանշանների, և՛ ձայնային ազդանշանների մասին: Բայց նման բան չի եղել: Ամեն ինչ տեղի է ունեցել հանկարծակի»,- մեջբերում է հեռուստաալիքը ձկնորս Մութհու Մունիրաջի խոսքերը, որը վիրավորվել է երկու ոտքից:
Պենտագոնը և ԱՄՆ պետքարտուղարությունը հայտարարում են, թե մոտեցող նավին ամերիկյան Rappahannock-ի անձնակազմը մի շարք նախազգուշական ազդանշաններ է ուղակել: Ամերիկյան կողմը նաև հայտնում է, որ միջադեպը հետաքննվում է, իսկ հետաքննության արդյունքները կներկայացվեն տուժած կողմին:
