Խորհրդարանում հանրային սեկտորը ներկայացնում է մեկ մարդ, այնինչ այն կազմում է հասարակության 90 %-ը. այսօր լրագրողների հետ հանդիպմանը ասաց Հայաստանի քաղաքագետների միության ղեկավար Հմայակ Հովհաննիսյանը` անդրադառնալով լրացուցիչ ընտրությունների անցկացման դեպքում իր թեկնածության առաջադրման պատճառներին:
Ըստ քաղաքագետի` մեր ձևավորած խորհրդարանում կա մի շատ լուրջ բաց, որը, օգտագործելով լրացուցիչ ընտրությունների պատեհությունը, պետք է աշխատել լրացնել: Հմայակ Հովհաննիսյանի խոսքով` միջազգային փորձը ցույց է տալիս, որ հասարակության մեջ կուսակցականների թիվը կազմում է 5-6 տոկոս, նույնիսկ ամբողջատիրական համակարգի պայմաններում կուսակցականների թվաքանակը Հայաստանում 200 հազար էր:
«Այսինքն` եթե հաշվի առնենք, որ ազգաբնակչության թիվը 3,5 միլիոն էր, դա 6 տոկոս էր կազմում, իսկ ժամանակակից եվրոպական երկրներում կուսակցականների թիվը հասարակության 5-6 տոկոսն է կազմում: Մնացյալը մտացածին թվեր են, որոնք կուսակցապետերը կրակում են՝ փորձելով ցույց տալ, թե հզոր են, ուժեղ են և այլն: Մինչդեռ կուսակցականների թիվը 200 հազարից չի անցնում, իսկ մյուս քաղաքացիները անկուսակցականներ են, որոնք ինչ-ինչ պատճառներով չեն ցանկանում կուսակցական լինել»,- նշեց Հմայակ Հովհաննիսյանը` հավելելով, որ անկուսակցականներն այսօր չեն կարողանում ազդել քաղաքական պրոցեսների վրա:
Քաղաքագետի համոզմամբ` մեծամասնական ընտրակարգով պետք է առաջադրվեն միայն անկուսակցականները, քանի որ կուսակցականները կարող են առաջադրվել՝ ընդգրկվելով կուսակցությունների ցուցակներում:
Հմայակ Հովհաննիսյանի կարծիքով` չափազանց կարևոր է, որպեսզի իշխող ուժը ընթացք տա այս առաջարկությանը, այսինքն՝ մեծամասնական ընտրակարգը պահպանվի, սակայն առաջադրվեն բացառապես անկուսակցականները, և 40 պատգամավորները ներկայացնեն հանրային սեկտորը:
