ՀՀ Ազգային ժողովի փոխնախագահ Էդուարդ Շարմազանովը հուլիսի 17-ին ընդունել է «Հայաստանի եվրոպացի բարեկամներ» (Բելգիա) կազմակերպության պատվիրակությանը: Վերջինս, Լեռնային Ղարաբաղի իշխանությունների հրավերով, հուլիսի 18-21-ը դիտորդական առաքելություն կիրականացնի ԼՂՀ նախագահի ընտրություններում: Պատվիրակության կազմում են Եվրոպական խորհրդարանի անդամ Էլենի Թեոխարոսը, ԵՄ արտաքին հարաբերությունների ամսագրի գլխավոր խմբագիր, Եվրոպական խորհրդարանի և Բունդեսթագի նախկին անդամ Հանս-Յուրգեն Զահորկան, «Հայաստանի եվրոպացի բարեկամներ»-ի գլխավոր քարտուղար Մայքլ Քեմբեքը, այլք: Այս մասին «Առաջին լրատվական»-ին հայտնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:
Ողջունելով հյուրերին Ազգային ժողով այցելելու, ինչպես նաև ԼՂՀ իշխանությունների հրավերն ընդունելու համար, Էդուարդ Շարմազանովը նշել է, որ եվրոպական արժեքների ամրապնդումն ու եվրաինտեգրման խորացումը Հայաստանի առաջնահերթություններից են: Նա, ի դեմս հանդիպման մասնակիցների, շնորհակալություն է հայտնել բոլոր նրանց, այն երկրներին ու կառույցերին, որոնք իրենց աջակցությունն են բերում Հայաստանում եվրոպական արժեհամակարգի, ժողովրդավարական ազատությունների առաջմղմանը:
ԱԺ փոխնախագահը հատկանշական է համարել Հայաստանի եվրոպացի բարեկամների այցը այն ժամանակ, երբ Լեռնային Ղարաբաղում կայանալու են հերթական նախագահական ընտրությունները: Նա վստահություն է հայտնել, որ հյուրերը, այցելելով Ղարաբաղ, իրենք կհամոզվեն, թե ժողովրդավարական արժեքները որքան առաջընթաց են ապրել, և որ այստեղ վճռական են հենց այս հիմքի վրա կայացնելու անկախ հանրապետությունը:
Էդուարդ Շարմազանովը կարևորել է «Հայաստանի եվրոպացի բարեկամներ» կազմակերպության մարդասիրական աջակցությունը` նշելով, որ այն բարձր է գնահատվում թե Հայաստանում, թե Արցախում:
Շնորհակալություն հայտնելով ջերմ ընդունելության համար` Էլենի Թեոխարոսը գոհունակությամբ նշել է, որ Հայաստանում առկա են եվրոպական արժեքները, և որ այստեղ հետամուտ են դրանց հետագա խորացմանն ու ամրապնդմանը: «Ես ուրախ կլինեմ եվրոպացիներին հաղորդելու այն առաջընթացի մասին, որն արձանագրել է Ձեր երկիրը ոչ միայն ժողովրդավարության կայացման, այլև այն բարելավելու ուղղությամբ: Ներկայում իմ երկիրը` Կիպրոսը, նախագահում է Եվրամիությունում, և հավաստիացնում եմ, որ հնարավոր ամեն ինչ կանենք` աջակցելու Հայաստանին բոլոր ուղղություններում»,-նշել է տիկին Թեոխարոսը: Ղարաբաղ իրենց այցելությունը նա որակել է որպես ուխտագնացություն` նշելով, որ ամենաազատ ոգին ինքը 15 տարի առաջ տեսել է հենց Ստեփանակերտում: Նա հավաստիացրել է, որ հայկական կողմը կարող է ապավինել բոլոր այն եվրոպական ուժերին, որոնք հետամուտ են հակամարտությունների, մասնավորապես ԼՂ հիմնախնդրի խաղաղ և արդարացի լուծմանը:
Իր հերթին Էդուարդ Շարմազանովը նշել է, որ Հայաստանում համոզված են` Կիպրոսի նախագահությունը ԵՄ-ում շատ արդյունավետ կլինի, անկախ նրանից, որ թուրք շատ գործիչներ այդ առումով տարբեր հակասական հայտարարություններով են հանդես գալիս: Նա, նշելով, որ Հայաստանը կողմնակից է միացյալ Կիպրոսին, համոզմունք է հայտնել, որ 21-րդ դարում ուժի դիրքերից խոսելը, պատեր շարելը, նախապայմաններ առաջադրելը եվրոպական արժեքների հետ որևէ կապ չունեն: «Խոսքն առնչվում է թե Թուրքիային, թե Ադրբեջանին: Հայաստանի Հանրապետությունը և ՀՀԿ-ն` որպես իշխող և ԵԺԿ անդամ կուսակցություն, գտնում են, որ հակամարտությունները պետք է լուծվեն բանակցությունների արդյունքներում և ոչ թե ուժի դիրքերից»,-ասել է Էդուարդ Շարմազանովը` հավաստիացնելով, որ այդպես են կարծում նաև Լեռնային Ղարաբաղում: Նա վստահություն է հայտնել, որ այցելելով ԼՂ` եվրոպացի գործիչներն անձամբ կհամոզվեն` Ղարաբաղի բնակչությունն իրոք իրական ժողովրդավարություն է կառուցում, և հետադարձ չկա: «Մեզ համար շատ կարևոր է, որ այս այցն իրականացնում են եվրոպացի մեր բարեկամները, ինչը շատ կարևոր է թե Հայաստանի Հանրապետության, թե ԼՂՀ քաղաքացիների համար»,-շեշտել է ԱԺ փոխնախագահը:
ԵՄ արտաքին հարաբերությունների ամսագրի գլխավոր խմբագիր, Եվրոպական խորհրդարանի և Բունդեսթագի նախկին անդամ Հանս-Յուրգեն Զահորկան էլ հավաստիացրել է, որ իրենց այս այցի արդյունքում եվրոպական շատ գործիչներ ու լրատվամիջոցներ կտեղեկանան այն իրականության մասին, որ այսօր տիրում է իր անկախությունը կերտող Լեռնային Ղարաբաղում:
Կողմերն անդրադարձել են այլ հարցերի ևս:
