Իտալական La Stampa թերթի փոխանցմամբ՝ Սաուդյան Արաբիայի հետախուզությունը պարզել է, որ Իրանը, շրջանցելով պատժամիջոցները, քաղաքացիական ինքնաթիռներով զենք է մատակարարում Ասադի ռեժիմին՝ օգտվելով Գերմանիայի օդային տերմինալներից:
Սաուդյան Արաբիան ստեղծել է հատուկ հետախուզական խումբ՝ խոչընդոտելու համար Թեհրանի օգնությունը Դամասկոսին և, ավելի լայն իմաստով, խանգարելու Իրանին ու նրա լիբանանյան դաշնակից «Հըզբոլլահին» Մերձավոր Արևելքում ստեղծել իրենց ցանցը՝ ընդդեմ արաբական սուննի երկրների:
Նշվում է, որ Թեհրանը Iran Air ազգային ավիաընկերության, ինչպես նաև ավելի փոքր Mahan Air և Yas Air ավիաընկերությունների Airbus A300 և Airbus A310 ինքնաթիռներով թեթև սպառազինություն, հետախուզական սարքավորում, հրթիռային արձակման սարքեր և անգամ հրթիռներ է ուղարկում: Զենքի և տեխնիկայի մատակարարումն իրականացնում է «Ալ Քուդս» ստորաբաժանումը:
Իրանը Սիրիային զենք է մատակարարում Թեհրան-Դամասկոս և Թեհրան-Բեյրութ ուղիղ երթուղիներով: Սակայն վերջին ամիսներին Դամասկոսում համալրումների կարիքը կտրուկ աճել է, և այդ երթուղիները սկսել են չբավականացնել: Այժմ Իրանը սկսել է գործածել Ֆրանկֆուրտի, Քյոլնի ու Համբուրգի տերմինալները: Ռազմական բեռներով լի իրանական ուղևորատար ինքնաթիռները ժամանում են Գերմանիա, իսկ այնտեղ էլ մեկնում են Դամասկոս:
Այդ մատակարարումների ծավալն այնքան մեծ է, որ Սաուդյան Արաբիան մտադիր է դիմել Բեռլինին և եվրոպական մյուս մայրաքաղաքներին՝ պահանջելով խստացնել հսկողությունն ու ճնշումը Iran Air-ի նկատմամբ:
