ՀՀ ԿԱ ԱԱԾ քննչական վարչությունում հարուցված և քննված քրեական գործով դատարանի 2011թ. դատավճռով Մեհմեդ Դեմիրարիրը, Խատիբ Հարիթուրինը, Ռամազան Դիշբուդաքիը, Սահրդամ Ահմադփորիրը, Մահուդ Ալոյը, Սարվաթ Ջայլանին և Լայլա Յուսուֆ- Բաղդաշին մեղավոր են ճանաչվել ՀՀ քրեական օրենսգրքի 329-րդ հոդվածի 2-րդ մասով և դատապարտվել ազատազրկման՝ յուրաքանչյուրը 3 տարի 6 ամիս ժամկետով:
«Փաստինֆո» լրատվական գործակալության փոխանցմամբ` նրանք Հայաստանի Հանրապետութուն են մուտք գործել Արարատի մարզի Սուրենավան սահմանամերձ գյուղի հարակից տարածքով՝ քաղաքական ապաստան հայցելու նպատակով:
Թուրքիայի քաղաքացիներ, ազգությամբ քրդեր, քրդական բանվորական կուսակցության անդամներ Մեհմեդ Դեմիրարիրը, Խատիբ Հարիթուրինը, Ռամազան Դիշբուդաքիը, Սահրդամ Ահմադփորիրը, Մահուդ Ալոյը, Սարվաթ Ջայլանին և Լայլա Յուսուֆ- Բաղդաշին թուրքական իշխանությունների հետապնդումից խուսափելու նպատակով որոշել են ապօրինի հատել ՀՀ պետական սահմանը:
Առանց սահմանված փաստաթղթերի և պատշաճ թույլտվության, Արարատի մարզի սահմանամերձ Սուրենավան գյուղի հարակից տարածքով հաղթահարելով ՌԴ դաշնային անվտանգության ծառայության սահմանապահ զորքերի 13-րդ սահմանապահ ուղեկալի ինժեներատեխնիկան կառույցները՝ 2010թ. նոյեմբերի 21-ին ժամը 00:30-ի սահմաններում հատել են Հայաստանի Հանրապետության պահպանվող պետական սահմանը և մուտք գործել մեր երկրի տարածք: Միայն 17 ժամ անց սահմանախախտները հայտնաբերվել են ԱԱԾ աշխատակիցների կողմից, երբ սահմանային ինժեներատեխնիկական միջոցների շրջանցման փաստը բացահայտելուց հետո այդ մասին իրազեկել են սահմանապահները:
Ըստ ՀՀ գլխավոր դատախազության ԱԱԾ մարմիններում քննվող և կիբերհանցագործությունների գործերով վարչությունում կատարված ուսումնասիրությունների՝ սահմանախախտները հայտնաբերվելուց հետո հայտարարել են սահմանը քաղաքական ապաստան հայցելու նպատակով խախտելու մասին, սակայն նրանց պատճառաբանությունը հիմնավոր չի համարվել քաղաքական ապաստան տալու համար և մերժվել է:
