«Առաջին լրատվական»-ի զրուցակիցն է Կոտայքի մարզպետ Կովալենկո Շահգալդյանը:
– Պարոն Շահգալդյան, ինչպե՞ս է լինում, որ փոխմարզպետը ձերբակալվում է 100 դոլար կաշառք վերցնելիս: Ի վերջո, հայտնի է, որ մարզը ԲՀԿ ազդեցությունն է կրում: Իսկ Դուք և ձերբակալված փոխմարզպետը ՀՀԿ ներկայացուցիչներ եք: Դուք քաղաքական ենթատեքստ տեսնո՞ւմ եք Ձեր տեղակալի ձերբակալման գործում:
– Դուք պետք է քաղաքական ենթատեքստ տեսնեք, ոչ թե ես: Ես ազդեցություններից ու բաժանումներից տեղյակ չեմ: Այլ մանրամասների համար դիմեք իրավապահ մարմիններին:
– Իսկ Ձեր օգնական Լևոն Միքայելյանն ինչպիսի՞ մարդ էր, ի՞նչ մարդկային ու մասնագիտական որակներ ուներ: Ինչպե՞ս եք համագործակցել Լևոն Միքայելյանի հետ:
– Մենք միմյանց հետ խնդիրներ չենք ունեցել: Շատ անսպասելի և շատ տգեղ գործ էր:
– Դուք համարում եք, որ նա անբասի՞ր մարդ է եղել: Չէ՞ որ Դուք ամենօրյա շփումներ եք ունեցել: Ի՞նչ տպավորություն եք ստացել: Նա կարո՞ղ էր այդպիսի գործեր անել:
– Փաստը արդեն կա: Եթե կա, ուրեմն նա կատարել է նման արարք, և հենց այդ պահին էլ ֆիքսել են:
– Իսկ Ձեր կենսափորձը չէ՞ր հուշում, որ Ձեր տեղակալը կոռուպցիոն գործերով է զբաղված:
– Մի շտապեք: Համբերեք: Նախաքննությունը կիրականացնեն, բոլորդ մանրամասները կիմանաք:
– Ձեր ղեկավարած համակարգում կարո՞ղ են լինել այլ կաշառակերներ:
– Ոչինչ բացառված չէ: Ռուսական ասացվածք կա` «Երբեք մի ասա երբեք»:
– Դա ռուսակա՞ն ասացվածք է:
– Մենք եկել ենք խորհրդային համակարգից, որոշ բաներ ժառանգություն ենք ստացել:
– Իսկ Դուք վտանգ չե՞ք զգում այս անսպասելի ձերբակալությունից: Որովհետև հայտնի պրակտիկա է, երբ գործը տեղակալներից են սկսում:
– Դա միայն Ձեր երևակայության արդյունքն է: Ես նման մտավախություն չունեմ: Կարող եք դրանում չկասկածել:
– Դուք համարում եք, որ Հայաստանը իրավակա՞ն երկիր է:
– Այո՛: Եթե կարդաք Սահմանադրությունը, այնտեղ ամրագրված է այս դրույթը:
– Բայց այնտեղ ամրագրված է նաև, որ Հայաստանը սոցիալական երկիր է: Բայց Հայաստանը սոցիալական երկիր չէ, և դրա մասին բարձրաձայնել է անձամբ ՀՀ նախագահը:
– Սահմանադրական բոլոր դրույթների իրագործման ճանապարհը շատ բարդ է ու դժվար:
– Իսկ Դուք չգիտեի՞ք, որ Ձեր տեղակալը կոռուպցիայով է զբաղված, ինչո՞ւ ժամանակին չեք կանխել:
– Եթե ես իմանայի, թույլ կտայի՞:
– Իսկ ինչպե՞ս է առանց Ձեր գիտության նման գործերով զբաղվել:
– Աշխատակազմում 130 հաստիք կա: Ես չեմ կարող բոլորին ժամ առ ժամ, րոպե առ րոպե հետևել: Իսկ Դուք ի՞նչ կրթություն ունեք:
– Ինչո՞ւ:
– Հետաքրքիր է, իրավաբանի պես քննություն եք անցկացնում: