Կենտրոն և Նորք-Մարաշ վարչական շրջանների ընդհանուր իրավասության դատարանում քիչ առաջ ավարտվեց ՀԱԿ ակտիվիստներ Սարգիս Գևորգյանի, Դավիթ Քիրամիջյանի, Տիգրան Առաքելյանի և Արտակ Կարապետյանի գործով մեղադրական դատավճռի ընթերցումը: Մեղադրող դատախազ Հակոբ Մարտիրոսյանի ներկայացրած մեղադրական ճառը ժամանակ առ ժամանակ հունից հանում էր ՀԱԿ ակտիվիստներին, որոնք պնդում էին, որ մեղադրող դատախազը մի շարք հատվածներում խեղաթյուրում է փաստերը:
Ինչևէ, մեղադրող դատախազը այսօր ևս հիմնավոր համարեց բոլոր այն մեղադրանքները, որոնք առաջադրված են ակտիվիստներին և հիշեցրեց, որ ակտիվիստները մեղադրանքները չեն ընդունում:
Հիշեցնենք, որ Տիգրան Առաքելյանին մեղադրանք է առաջադրվել այն բանի համար, որ 2011թ. օգոստոսի 9-ին ժամը 21-ի սահմաններում, Երևան քաղաքի Տերյան փողոցի թիվ 42 շենքի մոտ, Արտակ Վոլոդյայի Կարապետյանի հետ միասին, իշխանության ներկայացուցիչներ հանդիսացող, Տերյան փողոցում պարեկային ծառայություն իրականացնող ՀՀ Ոստիկանության Երևան քաղաքի վարչության ՊՊԾ գնդի 3-րդ հատուկ գումարտակի ոստիկաններ Վոլոդյա Գրիգորյանի և Դավիթ Մելիքյանի նկատմամբ, կապված նրանց կողմից իրենց ծառայական պարտականությունները կատարելու հետ, գործադրել են նրանց կյանքի կամ առողջության համար ոչ վտանգավոր բռնություն` Տիգրան Առաքելյանը բռունցքով հարվածել է Դավիթ Մելիքյանի պարանոցին` վերջինիս պատճառելով առողջությանը թեթև վնասի հատկանիշներ չպարունակող ճանկռվածքի ձևով մարմնական վնասվածք, իսկ Արտակ Կարապետյանը քաշել պոկել է նրա ուսադիրն ու տարբերանշանը:
Դատական հաջորդ նիստի ընթացքում դատարանում կընթերցվեն ամբաստանյալների պաշտպանական ճառերը: Իսկ մեղադրական եզրակացության մանրամասները կներկայացնենք ավելի ուշ: Առայժմ նշենք, որ մեղադրող դատախազը ՀԱԿ ակտիվիստներից Տիգրան Առաքելյանի համար դատարանից 6 տարվա ազատազրկում պահանջեց:
Մեղադրողը միջնորդեց Արտակ Կարապետյանին ազատազրկման դատապարտել 3 տարի 5 ամիս 15 օր ժամկետով` միաժամանակ վերջինիս համար առաջ քաշելով մեղմացնող հանգամանք ՝ անչափահաս երեխա ունենալը: Սարգիս Գևորգյանին առաջարկեց դատապարտել 1 տարի 10 ամիս 20 օր ժամկետով, իսկ Դավիթ Քիրամիջյանին` 2 տարի ժամկետով:
