ԿԺԴՀ իշխանությունները խնդրել են հյուսիսկորեական առաջնորդ Կիմ Չեն Ինի ավագ եղբորը զերծ մնալ երկրի քաղաքական ռեժիմը քննադատելուց: Այս մասին հաղորդում է Agence France-Presse-ը:
Մշտապես Մակաոյում բնակվող 41-ամյա Կիմ Չեն Նամի հետ զրույցը տեղի էր ունեցել երկու ամիս առաջ, երբ նա գաղտնի այցելել էր հայրենիք: Հյուսիսային Կորեայի Աշխատանքային կուսակցության ղեկավարներից մեկը նրանից պահանջել էր դադարեցնել արտասահմանյան ԶԼՄ-ներին երկրի քաղաքական կյանքի մասին մեկնաբանություններ տալը և երկրի առաջնորդի դերում Կիմ Չեն Ինի նշանակումը քննադատելը: Թե ինչ նպատակով էր Կիմ Չեն Նամն այցելել Հյուսիսային Կորեա՝ չի հաղորդվում:
Ավելի քան 10 տարի է՝ Կիմ Չեն Նամը բնակվում է Չինաստանում և կապ չի պահպանում Հյուսիսային Կորեայի իշխանությունների հետ: 2001 թվականին նրան կեղծ անձնագրի պատճառով բռնել էին Ճապոնիայի ճանապարհին, որտեղ, ինչպես հաղորդվում էր, ցանկանում էր այցելել Դիսնեյլենդ:
2012-ի հունվարին, Կիմ Չեն Իրի մահից հետո, Ճապոնիայում լույս տեսավ Tokyo Shimbun պարբերականի լրագրող Յոձի Գոմիի գիրքը՝ հիմնված Կիմ Չեն Նամի հետ զրույցների և նամակագրության վրա: Լրագրողի հետ զրույցում հանգուցյալ առաջնորդի ավագ որդին ԿԺԴՀ-ում կանխատեսել էր տնտեսական կոլապս և նշել, որ իր եղբայրը երկրի ղեկավարման ձևական ֆիգուր է: Նա նաև քննադատել էր իշխանության ժառանգաբար փոխանցման գործընթացը՝ այն համարելով անընդունելի:
