Վերջերս Սամվել Ալեքսանյանը հայտարարել էր, թե Ախուրյանի շրջանում շաքարի ճակնդեղի մշակությունը խթանելու նպատակով իրենք բոլոր պայմաններն ապահովում են գյուղացու համար, մթերման գինը սահմանել են 40-45 դրամ, շաքարի ճակնդեղի սերմնացուն էլ տրամադրում են, սակայն գյուղացին հրաժարվում է մշակել:
«Ֆերմերային շարժում» ՀԿ նախագահ Սարգիս Սեդրակյանն «Առաջին լրատվական»-ի հետ զրույցում նշեց, որ շաքարի ճակնդեղի մշակությունը բավականին բարդ, աշխատատար պրոցես է և բոլորովին հեշտ չի: Օրինակ՝ լոլիկ մթերող գործարանները իրենք են գյուղացուն սերմով, պարարտանյութով և թունաքիմիկատով ապահովում և ստացված բերքը մթերում, որը ամենախելացի տարբերակն է:
«40-45 դրամը շատ ցածր գին է ճակնդեղի համար, իսկ գյուղացին, որքան էլ ծանր վիճակում է այսօր գտնվում, բայց համբալ չի: Գյուղատնտեսությամբ զբաղվելն անշահավետ է դարձել, ամեն ինչը շատ թանկ է»,- ասաց Ս. Սեդրակյանը՝ նշելով, որ շաքարի ճակնդեղի մթերման գինը պետք է սահմանվի մոտ 80 դրամ, որպեսզի գյուղացու համար այն մշակելը շահավետ լինի:
