Հուլիսի 13-ին, Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է Նոր Նախիջևանի և Ռուսաստանի հայոց թեմի Մոսկվայի հայորդյաց տան ստեղծագործական խմբերին` ուղեկցությամբ հայորդյաց տան տեսուչ Տ. Առաքել քահանա Ամիրյանի:
Հանդիպման սկզբում շնորհակալություն հայտնելով Վեհափառ Հայրապետին ընդունելության համար` տեսուչ Տեր Հայրը տեղեկացրել է, որ թեմակալ առաջնորդ Տ. Եզրաս եպիսկոպոս Ներսիսյանի օրհնությամբ և մոսկվաբնակ հայ բարերար Էդգար Արամյանի հովանավորությամբ հաստատության սաներն ամեն տարի ուխտագնացության են գալիս հայրենի երկիր` այցելելու սրբավայրեր և հաղորդ դառնալու ազգային ու հոգևոր սրբազան արժեքներին: Տեր Հայրն իր խոսքում նշել է, որ հայորդյաց տան ստեղծագործական խմբերը` «Գավիթ» թատրոնը, «Հայասա» ու «Ովսաննա» պարային համույթները և «Նորահրաշ» երգչախումբը, արդեն ելույթներով հանդես են եկել Հայաստանի մի շարք հայորդյաց տներում:
Այնուհետև հայորդյաց տան սաների ներկայությունը համայն հայության նվիրական հոգևոր կենտրոնում ողջունեց Վեհափառ Հայրապետը` ուրախություն հայտնելով երիտասարդների ստեղծագործական ձեռքբերումների կապակցությամբ: Նորին Սրբությունն ընդգծեց, որ հայորդյաց տան սաների հաջողությունները վկայությունն են թեմական կյանքում ծավալվող հոգևոր և հայապահպան աշխույժ գործունեության: Այս առիթով Վեհափառ Հայրապետն իր գնահատանքը բերեց Նոր Նախիջևանի և Ռուսաստանի հայոց թեմի առաջնորդ Եզրաս Սրբազանին` եկեղեցու հովանու ներքո երիտասարդներին կրթելու և հայ ազգային ավանդները նրանց մեջ միշտ ամուր պահելու ջանքերի համար:
Հանդիպման ժամանակ «Նորահրաշ» երգչախումբը հանդես է եկել ազգային և հոգևոր երգերի գեղեցիկ կատարումներով: Վերջում Ամենայն Հայոց Կաթողիկոսը վերստին իր օրհնությունը բերեց հայորդյաց տան սաներին` մաղթելով միշտ հավատարիմ մնալ ազգային և եկեղեցական արմատներին, անաղարտ պահպանել իրենց ազգային ինքնությունն ու դիմագիծը:
