Բրիտանական The Daily Telegraph թերթի փոխանցմամբ՝ բրիտանական MI6 հետախուզության ղեկավար Ջոն Սոերսն առաջին անգամ հրապարակավ գնահատական է տվել Իրանի միջուկային ծրագրին: Նա հայտարարել է, որ իրենց ջանքերի շնորհիվ ձգձգվել են միջուկային զենք ստանալու Իրանի հնարավորությունները:
Սոերսն ընդգծել է, որ եթե չլինեին Մեծ Բրիտանիայի հատուկ ծառայությունների ջանքերը, ապա Իրանը միջուկային զենք ձեռք բերած կլիներ արդեն 2008 թվականին: Միևնույն ժամանակ, նա նկատել է, որ Թեհրանը կարող է միջուկային զենք ստանալ մինչև 2014 թվականը:
Փորձագետները կարծում են, որ բրիտանական հետախուզության ղեկավարի այս հրապարակավ հայտարարությունը միտված է միջազգային հանրությանն իրազեկելուն, թե միայն ԱՄՆ-ի և Իսրայելի հատուկ ծառայությունները չեն, որ խոչընդոտում են Իրանի կողմից միջուկային զենք ունենալու գործընթացին:
