Հայ ազգային կոնգրեսի խորհրդարանական խմբակցությունը քիչ առաջ ԱԺ քարտուղարությունից վերցրել է ձևաթուղթ՝ հուլիսի 17-ին ԱԺ արտահերթ նիստ հրավիրելու համար: ՀԱԿ-ն այսօր հայտարարել էր, որ հանդես է գալիս ԱԺ արտահերթ նստաշրջան գումարելու նախաձեռնությամբ, որի օրակարգում լինելու է «Հարսնաքարի» միջադեպի հետ կապված ԱԺ ժամանակավոր հանձնաժողով ստեղծելու հարցը: Քսանչորս ժամվա ընթացքում ՀԱԿ պատգամավորները պետք է կարողանան հավաքել 44 ստորագրություն, որից հետո նոր միայն հնարավոր կլինի արտահերթ նստաշրջան գումարել: Սակայն դեռևս հայտնի չէ՝ հնարավոր կլինի՞ հավաքել այդքան ստորագրություն, թե ոչ: Ստորագրությունների մեծ մասը պետք է ապահովեն ԲՀԿ պատգամավորները, սակայն ավելի վաղ ԲՀԿ-ական Նաիրա Զոհրաբյանն ասել էր, որ իրենց պատգամավորների մեծ մասը Հայաստանում չեն, մեկնել են արտերկիր հանգստի և չեն կարող միանալ ստորագրությանը:
ԲՀԿ պատգամավոր Տիգրան Ուլիխանյանը «Առաջին լրատվական»-ի հետ զրույցում նշեց, որ հստակ չգիտի՝ իրենց պատգամավորներից քանիսն են բացակայում երկրից:
« Գիտեմ, որ այս պահին 5-6 հոգի Հայաստանում չեն, գործուղման են մեկնել: Հնարավոր է, որ Հայաստանում եղած պատգամավորները միանան»,- ասաց Ուլիխանյանը՝ միաժամանակ հավելելով, որ արտահերթ նստաշրջանի հարցը ՀԱԿ-ն իրենց հետ մանրամասն չի քննարկել:
«Ես կարծում եմ, որ հարցի քաղաքական շահարկում չպետք է լինի: Քրեական օրենսգիրքը հստակ սահմանել է իր վերաբերմունքը տվյալ հանցագործության համար: Կուզեի, որ հայաստանյան օրենքով սևով սպիտակին գրված կերպով ամեն բան տեղի ունենա՝ առանց քաղաքական շահարկումների»,- նշեց նա:
ԱԺ Ժառանգություն խմբակցությունը դեռ հստակ չի հայտարարել՝ միանում է ՀԱԿ նախաձեռնությանը, թե ոչ: Խմբակցության անդամ Ալեքսանդր Արզումանյանը տեղեկացրեց, որ ԱԺ-ում ԲՀԿ-ի հետ հիմա այդ հարցն են քննարկում:
