Գյուղմթերքների արտահանման արդյունքում ՀՀ առևտրաարդյունաբերական պալատը 30-40% ավելի արտոնագրեր է տվել: Ինչպես «Առաջին լրատվական»-ին հայտնեց ԱԱՊ գործադիր տնօրեն Արա Վարդանյանը, այս ակտիվությունը կշարունակվի մինչև հոկտեմբերի վերջ:
2012 թ. երկրորդ կիսամյակի վիճակագրական ցուցանիշների արդյունքները դեռ չեն ամփոփվել, իսկ տարվա առաջին եռամսյակում տրվել է արտահանման 9 հզ. արտոնագիր՝ նախորդ տարվա նույն ժամանակահատվածի համեմատ 20%-ով ավելի: Սա, ըստ Ա.Վարդանյանի, նշանակում է, որ արտահանման տեմպերը վերականգնվում են, թեև դեռ չեն հասել 2008 թ. ծավալներին:
«Ամեն ինչ անում ենք, կապված բերքի հետ, որ չսպասեն գյուղացիները: Ամեն տարի հունիսի 1-ից մինչև նոյեմբերի 1-ը շաբաթ-կիրակի և տոնական օրերին մեր արտոնագրերի տրամադրման բաժինն աշխատում է: Ամեն ինչ անում ենք, որ բերքը չվնասվի, որովհետև այդ բերքի 1-2 օր մնալը ինչ-որ տեղ նշանակում է, որ բերքը որակազրկվում է»,- ասաց Ա.Վարդանյանը: