ՆԱՏՕ-ն չի պատրաստվում կրճատել զինվորական ներկայությունը Կոսովոյում և այնտեղ կթողնի մինչև 6 հազար զինվորականների։ Այս մասին երեկ հայտարարել է ՆԱՏՕ-ի գլխավոր քարտուղար Անդրես Ֆոգ Ռասմուսենը։ 2010թ.-ից մինչև հիմա ՆԱՏՕ-ն այդ երկրում իր ներկայությունը կրճատել է` 15 հազարից հասցնելով մինչև 6 հազարի։ Սպասվում էր, որ այս տարի այդ թիվը կհասնի 2.5 հազարի։ Այս մասին հաղորդում է Reuters գործակալությունը։
Հիշեցնենք, որ KFOR խաղաղապահ ուժերը Կոսովոյում են գտնվում 1999թ.-ի ամռանից` ՄԱԿ-ի Անվտանգության խորհրդի 1244 բանաձևի համաձայն։ Ներկայում KFOR-ի ուժերում ծառայում են 29 երկրի 6.2 հազար զինվորականներ։ Հավանաբար, ՆԱՏՕ-ի նման որոշման պատճառը 2011-ից հետո այս երկրում սրվող իրավիճակն է. էթնիկական սերբերի և ալբանացիների միջև հյուսիսում պարբերաբար տեղի են ունենում միջէթնիկ բախումներ։
