Պետական գնումների ոլորտը թափանցիկ չէ, մրցույթը նախօրոք է արվում և հայտնի է, թե ով պետք է հաղթի, ու այդպես վերջանում է ամբողջ «մրցույթ» ասվածը: Նման տեսակետ «Առաջին լրատվական»-ի հետ զրույցում հայտնեց «Կոմֆորտ Ռ&Վ» ՍՊԸ-ի տնօրեն Ռուբեն Շահմուրադյանը, նշելով, որ հաճախ կազմակերպություններին չեն տեղեկացնում մրցույթների մասին՝ ինչ գնումներ են լինելու, երբ, և դրանց մասին հայտնի է դառնում միայն դրանց ավարտից հետո:
«Այսինքն՝ խաղից դուրս վիճակում ենք լինում: Համակարգն անթափանց է, չկա մրցակցություն, չկան գնումներ, կա պայմանավորվածություն, և ով պետք է հաղթի, նա էլ հաղթում է»,- ասաց Ռ. Շահմուրադյանը:
Նրա խոսքով՝ մրցույթի ժամանակ անվանական գրվում է, թե պատվիրատուն ինչ ֆիրմայի ապրանք է ուզում, իսկ դա արդեն չեղավ մրցույթ:
Անդրադառնալով ՀՀ ֆինանսների նախարարության Գնումների աջակցման կենտրոնի մատուցած ծառայություններին՝ Ռ. Շահմուրադյանը հայտարարեց, որ կենտրոնը մրցույթները բիզնես է դարձրել իր համար, օրինակ՝ հայտ գրելն արժե 7 հզ. դրամ, տարեկան ծառայությունը՝ հայտարարված մրցույթների մասին տեղեկություն տրամադրելը, պայմանագիր կնքելը՝ 400 հզ. դրամ, նման ծառայությունը եռամսյակի համար՝ 100 հզ. դրամ, և այլն: Շահմուրադյանն առաջարկել է տոկոսով սպասարկել և, եթե հաղթեն մրցույթում՝ ընդհանուր գումարից տոկոս վճարեն, սակայն կենտրոնը չի համաձայնել: «Ստացվում է, որ եթե չհաղթեմ, այդ դեպքում էլ պետք է 400 հզ. դրամ տամ, իսկ եթե անգամ մի կերպ հաղթենք, ո՞վ է ասում, թե կկարողանանք վերջում այդ օբյեկտը հանձնել շահագործման: Եթե չհամաձայնեցված է մրցույթ հայտարարողի հետ, ապա երբևէ չենք հանձնի, կամ կհանձնենք շատ վնասով և երբևէ չենք մասնակցի մրցույթի: Իսկ մենք մեր կյանքի փորձից գիտենք, որ մրցույթին մասնակցելու դեպքում միայն գները չէ, որ հաշվի են առնվում, այլ այն կողմը, որ մրցույթը հայտարարում է, անպայման շահագրգիռ է, և եթե շահագրռգություն չունենա, դու երբեք չես հաղթի մրցույթում»,- նշեց Ռ. Շահմուրադյանը:
Ըստ նրա՝ մրցույթներն էլեկտրոնային եղանակով հայտարարելը էական արդյունք չի տա. «Նրանց պայմանները մենք չենք կարողանում բավարարել: Ես չեմ ուզում փակագծերը բացել, բայց պայմանները չենք կարողանում բավարարել: Իրանց պահանջները մեր շահույթներից բարձր են»:
Գործարարը նաև նշեց, որ պետականի հետ միաժամանակ մասնավոր գնումների համար ընթացակարգ է հարկավոր սահմանել, քանի որ մասնավորը մատակարարին հորդորում է իրական 8 միավոր գնի փոխարեն 10 գրել փաստաթղթերում, և այդ 2 միավոր տարբերությունը բաժանում են իրար մեջ. «Գնումների դեպքում մրցակիցը 15%-ը հետ է վերադարձնում, որպեսզի ինքը հաղթի մրցույթում: Այսինքն՝ նա շահագրգռված է, որ այդ ֆիրմայից գնի: Նույնն անում են, պետական ֆիրմաների միջնորդներն ու գնորդները: Սա է այսօր մեր երկրի ամբողջ ցավը»:
