Новости-Грузия-ի փոխանցմամբ՝ Վրաստանի նախագահ Միխեիլ Սաակաշվիլին, ամփոփելով երեկ «Վրաստանի եվրոպական ուղին. ԵՄ-ը և նրա եվրոպական հարևանները» միջազգային կոնֆերանսի արդյունքները, հայտարարել է, որ 2013 թվականին Վրաստանն իրական հնարավորություններ կստանա ԵՄ-ի հետ սերտ համագործակցության համար.
«Հաջորդ տարի մենք բացարձակապես իրական հնարավորություններ ունենք ԵՄ-ի հետ հաստատելու ազատ առևտրի ու ոչ վիզային ռեժիմներ: Ներկայումս Վրաստանը բանակցություններ է վարում «Էրազմուս Մունդուս» ծրագրում վրացի ուսանողներին ընդգրկելու ուղղությամբ: Դա բարձրագույն կրթության ոլորտում համագործակցության ու փոխանակման ծրագիր է, որը մեր ուսանողներին հնարավորություն կտա սովորել եվրոպական համալսարաններում:
Բացի այդ, Վրաստանում բացվելու է եվրոպական քոլեջ, որը գոյություն ունի միայն Բելգիայում: Այդպիսի քոլեջի բացումը նշանակում է, որ վրացի ու եվրոպացի ուսանողները կարող են սովորել Բաթումում, ուր կտրվի եվրոպական դիպլոմ և հեռանկար կստեղծվի Եվրոպայում աշխատանքի տեղավորվելու համար»:
