Այսօր ինչպես հայտնի է, Երեւանում էր Ուկրաինայի ԱԳ նախարար Կոնստանտին Գրիշչենկոն:
Նրա այցից մի քանի օր առաջ Wikileaks-ըմի ուշագրավ պատմություն էր բացահայտել, համաձայն որի` ՀՀ-ում ԱՄՆ դեսպան Մարի Յովանովիչը խոսել էր Ուկրաինայի դեսպանի վրա հարձակման մասին: Հայաստանում այն ժամանակվա Ուկրաինայի դեսպանը պետք է հոկտեմբերի 20-ին Երևանում անցկացներ Հոլոդոմորի հետ կապված միջոցառում, ինչին Հայաստանի կառավարությունը փորձել է խոչընդոտել և չեղյալ համարել: Բանն այն է, որ այդ օրը Հայաստան էր ժամանում ՌԴ նախագահ Դմիտրի Մեդվեդևը, և Հոլոդոմորի միջոցառումը վատ կընդունվեր ռուսական կողմից:
Դեսպանը ամերիկացիներին պատմել էր, որ հոկտեմբերի 19-ին իրեն կանչել են ԱԳ նախարարություն, որտեղ նախարարը հորդորել էր դեսպանին չեղյալ համարել Հոլոդոմորի միջոցառումը: Դեսպանը հրաժարվել էր դա անել, որից հետո նրա բացակայության ժամանակ ներխուժել են նրա բնակարան, ջարդուփշուր են արել շատ իրեր, սակայն շատ բան չեն հափշտակել:
Այսօր ՀՀ ԱԳՆ մամլո ծառայությանը «Առաջին լրատվականը» խնդրեց ներկայացնել Հայաստանի ԱԳՆ-ի պաշտոնական դիրքորոշումը Հոլոդոմորի ճանաչման վերաբերյալ: Մեզ պաշտոնապես այսպես պատասխանեցին.
«Դատապարտելով հանդերձ Հոլոդոմորը որպես ոճրագործություն, գտնում ենք, որ այն ստալինյան շրջանի բռնույթուններից է, որոնցից տուժել են ԽՍՀՄ բոլոր ժողովուրդները»:
Զարմանալին այն է, որ այսօր Թուրքիայի իշխանությունները նմանատիպ պատասխան են տալիս Հայոց Ցեղասպանության առնչությամբ` «ողբերգական իրադարձությւոնների» պատճառ համարելով Օսմանյան կայսրության փլուզման ընթացքում ազգայնական շարժումների ակտիվացումն ու Առաջին համաշխարհային պատերազմը և նշում են, թե այդ շրջանում շուրջ 250,000 թուրք է զոհվել: