Եգիպտոսի հրապարակներում իսկական ցնծություն է: «Եգիպտոսն ազատ է», «Նա գնա՛ց»` ահա այսպիսի բացականչություններով են միմյանց շնորհավորում 20 օր շարունակ փողոցից տուն չգնացած, իրենց վերջնական նպատակին հասած ցուցարարները, որոնք չունեին առաջնորդ, այլ ունեին հստակ նպատակ` հաղթել:
Այսօր իր կյանքի լավագույն օրն է համարում ընդդիմության առաջնորդ, ՄԱԳԱՏԵ-ի նախկին ղեկավար, Նոբելյան մրցանակակիր Մուհամադ Ալ-Բարադեին:
«Սա իմ կայնքի լավագույն օրն է: Երկիրը դարձավ ազատ` տասնամյակների բռնություններից հետո»,- ասել է Ալ-Բարադեին: Նա հույս է հայտնել, որ իշխանության փոխանցումը կլինի «գեղեցիկ»: Այս մասին հաղորդում է Associated Press գործակալությունը:
«Առաջին լրատվականը» քիչ առաջ տեղեկացրել էր, որ առաջիկա ժամերին իր պաշտոնից հրաժարվելու մասին էր իշխող Ազգային ժողովրդավարական կուսակցության նախագահ Հուսամ Բադրաուին: Հոսնի Մուբարաքի հրաժարականից րոպեներ անց հայտնի դարձավ Բադրաուիի հրաժարականի մասին: Այս մասին հաղորդել է Al-Ahram-ը:
Հիշեցնենք, որ օրեր առաջ բարեփոխումների իմիտացիա ստեղծելու համար իշխող կուսակցությունում տեղի ունեցան զգալի փոփոխություններ: Իրենց պաշտոնները թողեցին նաև կուսակցության ղեկավար ողջ մարմինը` գլխավոր քարտուղար Սաֆուաթ Ալ-Շարիֆը և կուսակցության քաղաքական կոմիտեի ղեկավար, Հոսնի Մուբարաքի որդին` Գամալ Մուբարաքը:
Իշխող կուսակցության գլխավոր քարտուղար էր դարձել Ազգային ժողովրդավարական կուսակցության բարեփոխական թևի առաջնորդ, ազատական գաղափարախոսության կողմնակից Հուսամ Բադրաուին:
Բացի այդ, ղեկավար մարմնում տեղ են զբաղեցրել «Ալ-Ահրամ» ինֆորմացիոն հոլդինգի ղեկավար Աբդ Ալ-Մունեմ Սայիդը և ֆինանսների ներկայիս նախարար Սամիր Ռադուանը: