Մեկնարկել է ART-EXPO-ն, որը մշակույթի նախարարությունը կազմակերպում է ամեն տարի` սկսած 2009թ.-ից: EXPO-ն բացվել է այսօր Նկարիչների Միությունում և տևելու է երկու օր: Ներկայացված են ավելի քան հինգ տասնյակ պետական և մասնավոր մշակութային կազմակերպություններ: Այսօր բացման արարողությանը մասնակցել է նաև նախագահ Սերժ Սարգսյանը:
Մշակույթի նախարար Հասմիկ Պողոսյանի խոսքով տարեց տարի ավելի լավ է կազմակերպվում ART-EXPO-ն:
«Երեկ մինչև գիշերը ժամը 1.30-ը ես Նկարիչների միությունում էի. ձևավորում էին ցուցասրահները, վերջին թերություններն էինք շտկում»,- «Առաջին լրատվականի» հետ զրույցում ասում է Հասմիկ Պողոսյանը: «Իհարկե, կան բաներ, որոնք ավելի լավ կարելի էր անել: Ես արդեն 6 անգամ շրջել եմ ցուցասրահում, ուշադրություն եմ դարձրել բոլոր ներկայացուցչություններին: Մենք կքննարկենք թերությունները ու կշտկենք հաջորդ տարի»,- ասում է Հասիկ Պողոսյանը:
Նախարարի խոսքով, ART-EXPO-ն նախորդ տարվա կատարած աշխատանքի արդյունքն ու հաշվետվությունն է:
«Մշակութային կազմակերպությունները վերանայում են իրենց տարվա գործողությունները ու տարեկան հաշվետվություն ներկայացնում հասարակությանը»,- ասում է Հասմիկ Պողոսյանը: